Qazaqstan shahtalarynyń qaýipsizdigin robot ıt tekserýi múmkin

<p>ASTANA. KAZINFORM &ndash; Almaty qalasy ınnovatsııalyq tehnologııalar parki shahtalardyń qaýipsizdigin tekseretin jansyz ıt qurastyrdy. Úkimettiń kóshpeli otyrysy aıasynda ótken kórmede osy parktegi damý jáne ınnovatsııalar departamentiniń basshysy Darına Mamyrova osyndaı tehnologııany BAQ ókilderine tanystyrdy.</p>

- Bul negizi qytaılyq Unitree robotynyń modelimen jasalǵan. Robottyń ózi ǵana 10 myń dollar turady. Kóptegen qazaqstandyq kásiporyndar, tipti shaǵyndary da mundaı robotqa qol jetkize alady. Bizdiń osy jobaǵa tańdaý jasap otyrǵanymyz da sondyqtan. Ózge tehnologııalardan baǵasy boıynsha da, fýnktsıonaldyq artyqshylyq jaǵynan da artyqshylyqtary bar, - deıdi ol.

Robotty qazaqsha dybystap basqarýǵa da bolady. 

- Bul ózi tórt aıaqty robot. 360 gradýsta aınalyp túsiretin kamerasy bar. Shahtadaǵy gazdyń ýyt deńgeıin, jylý datchıkteri arqyly adam izdeıtin qurylǵysy túgel Qazaqstanda jasalǵan. 

Robot jınaǵan derektiń bári vırtýaldy aqparat ortalyǵyna jiberiledi. Atalmysh robottandyrylǵan keshendi Qaraǵandy oblysynda «Qazaqmysqa» tıesili Nurqazǵan kenishinde synaqtan ótkizip kórdik. Jobanyń ózin qanshalyqty aqtaıtyny sol kezde tekserdik. Endi robotty qosymsha datchıktermen jabdyqtap jatyrmyz, - dedi Darına Mamyrova.

Bul qurylǵy kásiporyndardaǵy ónerkásip qaýipsizdigin saqtaýǵa arnalǵan.

- Jyl saıyn Qazaqstandaǵy kásiporyndarda shahtaǵa gaz taraýdyń kesirinen, jarylystar kesirinen birshama adamnyń ómiri qıylyp jatady. Robot osyndaı qaterlerdiń aldyn alýǵa kómektesedi. 

Robot shahtaǵy jiberilgennen keıin dybystyq pármen arqyly basqarylady. Shahtadaǵy aýanyń sapasy, kómirtegi men otteginiń úlesi týraly derekti ústidegi dıspetcherlik bólimge joldap otyrady. Dıspetcher sol derektiń negizinde jumysshylardy ýaqytynda qaýipsiz jerge kóshire alady, - dedi maman.