Qazaqstan shahmat federatsııasynyń josparyna jyl saıyn 1,5 mlrd teńge qajet - Dármen Sádýaqasov

ALMATY. QazAqparat – Qazaqstan shahmat federatsııasynyń bıylǵy birinshi jartyjyldyqtaǵy kirisi - 192 mln teńge, al shyǵysy 175 mln teńge boldy. Bul týraly federatsııanyń vıtse-prezıdenti Dármen Sádýaqasov jýrnalıstermen kezdesý barysynda málim etti, dep habarlaıdy QazAqparat tilshisi.

Spıkerdiń sózinshe, 192 mln teńgeniń 93 mıllıony jekemenshik demeýshiler esebinen jınaldy. Al 74 mln teńge – memleketten berildi. Bul qarajat áıelder arasyndaǵy Gran-prı kezeńine bólingen. 15 mln teńge – týrnırlerge qatysqan shahmatshylardyń jarnasy. 8 mln astam teńge - basqa tabys kózderinen.

Shyǵyndar 175 mln teńgeni qurady. Bul qarajat qyzmetkerlerdiń eńbekaqy qoryna, mindetti zeınetaqy jarnalaryna jáne áleýmettik medıtsınalyq saqtandyrýǵa, áıelder Gran-prı kezeńin ótkizýge, Qazaqstanda týrnırlerdi uıymdastyrý men ótkizýge, MÁMS jáne FIDE aýdarymdaryna, issapar shyǵyndaryna jáne taǵy basqaǵa baǵyttaldy.

Dármen Sádýaqasov demeýshilik tólemderdiń sportshylardy qoldaýǵa baǵyttalǵanyn da aıtty.

«Bul jerde, ókinishke oraı, biz teńgerimsizdikti kórip otyrmyz.Demeýshilikten túsken 28 mln teńgeniń 24 mıllıony Bıbisara Asaýbaeva men onyń jattyqtyrýshylaryna bólindi»,- dedi Qazaqstan shahmat federatsııasynyń vıtse-prezıdenti Dármen Sádýaqasov.

Onyń aıtýynsha, 2022 jyldyń birinshi jartyjyldyǵynda sportshylar men jattyqtyrýshylarǵa 28,5 mln teńgege jýyq, al 2021 jylǵa 23 mln teńge eńbekaqy tólendi.

«Ótken jyly demeýshilik kómekti bólý aıtarlyqtaı teńgerimdi boldy, bizdiń talanttarymyzdyń óte kóp bóligi bul qoldaýdy salystyrmaly túrde az bolsa da aldy. Kóptegen jasóspirimder úshin bul mańyzdy qoldaý, biraq, 2022 jyldyń birinshi jartysynda biz teńgerimsizdikti baıqadyq. Kóptegen talanttar qoldaý tappady, sondyqtan federatsııa aldaǵy jumysynda úsh negizgi qaǵıdatty ustanatyn bolady. Bul - teńgerimdi qoldaý prıntsıpi, merıtokratııa prıntsıpi, ashyqtyq qaǵıdasy», – dedi D.Sádýaqasov.

Sonymen qatar, ol ótken jyly Mádenıet jáne sport mınıstrligi shahmatqa nebári 30 mln teńge bólgenin atap ótti.

«Bul - barlyq sportshylarǵa bir jylǵa bólingen aqsha. Árıne, jetkiliksiz qarjylandyrý», - dedi spıker.

Onyń paıymynsha, federatsııanyń barlyq josparyn júzege asyrý úshin jylyna shamamen 3 mln dollar qajet, bul shamamen 1,5 mlrd teńge.

«Eger biz shahmatty qoldaýǵa múmkindik beretin qarjylandyrýdyń eń az múmkin deńgeıleri týraly aıtatyn bolsaq, onda bul jylyna 700-800 myń dollar bolýy múmkin», - dep jaýap berdi ol jýrnalısterdiń saýalyna.