Qazaqstan saılaýy uıymdastyrýdy joǵary deńgeıimen erekshelenedi - Kanadalyq baıqaýshy Margaret Skok

ASTANA. QazAqparat - Búgin Parlament Májilisi men máslıhat depýtattarynyń saılaýyna arnalǵan brıfıngte halyqaralyq baıqaýshy, Kanadanyń Qazaqstandaǵy burynǵy elshisi, Halyqaralyq basqarý jáne ınnovatsııalary ortalyǵynyń ǵylymı qyzmetkeri Margaret Skok (Kanada) Qazaqstandaǵy saılaýdyń uıymdastyrý deńgeıin joǵary baǵalady.

Brıfıng barysynda sarapshy eń aldymen barsha qazaqstandyqtardy saılaýmen jáne Naýryz merekesimen quttyqtady.

«Men burynǵy Keńes Odaǵynyń barlyq respýblıkalarynda qyzmet babynda bolǵan edim. 25 jyldaǵy ózgerister óte zor. Osy elderdiń túrli baǵyttaǵy ózgeristerin baıqaý qyzyqty. Sonyń ishinde saılaý da bar. 12 saılaý ýchaskesinde boldym, saılaýshylar erekshe kóńil kúıde kelgenin kórdim. Tipti merekelik erekshe kıim úlgisimen kelgender de bar eken. Olardan bunyń mán-jaıyn suraǵanda olar saılaý men Naýryz qatar kelgenine de nazar aýdartty. Sosyn qart adamdardyń, úlken kisilermen birge sábılerdiń de saılaýdan qalmaı baryp jatqanyn baıqadym. Osynyń ózi saılaýǵa degen erekshe kóńil kúıdi bildiredi», - dedi Margaret Skok.

Onyń aıtýynsha, saılaý barysynda halyqaralyq baıqaýshylardyń biri úlken qart adamnan ne úshin saılaýǵa baratynyn suraǵan eken: «Sizdiń jasyńyz birazǵa keldi? Saılaýdyń sizge ne mańyzy bar, báribir emes pe?».

«Sonda álgi qart adam: «Men áli tirimin ǵoı. Endeshe, men de saılaýǵa, onyń nátıjesine áser etkim keledi» dep jaýap berdi. Shyndyǵynda, bul kútpegen jaıt sekildi», - dedi Margaret Skok. Sonymen qatar, baıqaýshy birqatar saılaý ýchaskelerinde bolǵanyn aıtyp, onda uıymdastyrý deńgeıi ár túrli ekenin jetkizdi.

«Meni saılaýdy uıymdastyrý deńgeıiniń joǵarylyǵy tánti etti. EQYU mıssııasy aıasynda Qazaqstanda ǵana emes, TMD-nyń birqatar elderinde boldym. Soǵan baılanysty salystyrsam, Qazaqstannyń saılaýdy uıymdastyrý deńgeıi joǵary», - dedi sarapshy.