Qazaqstan saılaýdy zań men halyqaralyq standarttarǵa sáıkes ótkizedi - SІM

ASTANA. QazAqparat – Parlament Májilisi men barlyq deńgeıdegi máslıhattar depýtattarynyń aldaǵy saılaýy – Qazaqstan úshin mańyzdy oqıǵa jáne elimizdiń qazirgi tarıhyndaǵy eń transformatsııalyq kezeńderdiń biri. Syrtqy ister mınıstriniń orynbasary Roman Vasılenko elimizde akkredıttelgen sheteldik dıplomatııalyq korpýs ókilderimen kezekten tys saılaýǵa daıyndyq máseleleri boıynsha kezdesý barysynda osyndaı pikir bildirdi, dep habarlaıdy QazAqparat tilshisi.

«Bul saılaý – demokratııany nyǵaıtý jolyndaǵy taǵy bir qadam. Qazaqstan shyn máninde jańa memleketke aınaldy. Elimiz aýqymy men deńgeıi jaǵynan biregeı, jan-jaqty saıası jańǵyrýdy bastan keship otyr. Іshki jáne syrtqy syn-qaterlerge qaramastan, elimiz óte mańyzdy reformalar keshenin júzege asyra aldy. Bul Prezıdent Qasym-Jomart Toqaev óziniń «Kúshti Prezıdent – yqpaldy Parlament – esep beretin Úkimet» formýlasyn dáıekti túrde ustanatynyn kórsetedi», - dedi Roman Vasılenko.

Onyń aıtýynsha, el basshylyǵynyń memleket pen qoǵamnyń turaqtylyǵy men birligin saqtaı otyryp, úzdiksiz progress pen oń ózgeristerdi qamtamasyz etýde nıeti aıqyn ári berik. Saıyp kelgende, bul saılaý ınklıýzıvti jáne aýqymdy reformalardy júrgizýge arnalǵan jańartylǵan demokratııalyq mandattyń arqasynda ulttyq jańǵyrýdy jedeldetýge múmkindik beredi.

Sondaı-aq, SІM orynbasary Qazaqstan saılaýdy ulttyq zańnama men úzdik halyqaralyq tájirıbelerge sáıkes ótkizetindigi týraly aıtty.

Eske salsaq, 19 naýryzda ótetin Májilis saılaýy barysyn 793 sheteldik baıqaýshy qadaǵalamaq. Onyń ishinde 131 baıqaýshy 41 shet memleketten jáne 662 baıqaýshy 12 halyqaralyq uıymnan.