Qazaqstan saılaý ótkizýden jaqsy tájirıbe jınady - Lıtvalyq baıqaýshy

NUR-SULTAN. QazAqparat - Lıtvadan kelgen halyqaralyq baıqaýshy Qazaqstandaǵy Prezıdent saılaýynda baıqaǵan jaıttar týraly pikirimen bólisti, dep habarlaıdy QazAqparat tilshisi.

Lıtvanyń Seıma depýtaty Sımonam Gentvılas Qazaqstanda saılaý ótkizý tájirıbesi jaqsy qalyptasyp kele jatqanyn atady.

«Osymen úshinshi ret sizderdegi saılaýǵa baıqaýshy retinde qatysyp otyrmyn. Burynǵyǵa qaraǵanda tájirıbe jınaqtap qalǵandaryńyz kórinip tur. Saılaý ýchaskesindegi adamdar syrttan kelgen baıqaýshylarǵa burynǵydaı saqtyqpen qaraǵan joq. Suraǵan aqparatynyń barlyǵyn usynyp, jylyshyraı tanytty. Qala ishinde kóp júrdik. Sonda baıqaǵanymyz, Eýropada jarnama kóbirek bolady. Sonda da, barlyq kandıdattarǵa birdeı múmkindik berildi dep oılaımyz. Endigi mańyzdysy daýystardyń durys sanalýy», - dedi lıtvalyq baıqaýshy.

Aıta ketsek, sońǵy málimet boıynsha eldegi saılaýshylardyń 72,9 paıyzy daýys berdi.

Buǵan deıin, Bolgarııa, Ispanııa jáne Grekııa elinen kelgen halyqaralyq baılaýshylar saılaýdan túıgen pikirlerin bildirgen bolatyn.