Qazaqstan saıasatyndaǵy genderlik teńdik deńgeıi qandaı

NUR-SULTAN. QazAqparat – Qazaqstan Úkimetiniń 22 múshesiniń ishinde tek eki-aq áıel bar. Ol laýazymdardy Densaýlyq saqtaý mınıstri Ajar Ǵanııat pen Eńbek jáne halyqty áleýmettik qorǵaý mınıstri Tamara Dúısenova ıelengen, dep habarlaıdy QazAqparat tilshisi.

«Qazaqstan saıasattaǵy genderlik teńdikke, Parlamenttegi áıelder sanynyń ósýine jáne áıelderdiń bıznestegi róline degen umtylysyn maqtan tutady. Alaıda bul jetistikterdiń barlyǵy kúmándi. Shyn máninde, el basshylyǵynda áli de áıelder joqtyń qasy, al Parlament depýtattarynyń arasynda olardyń úlesi úshten birge de jetpeıdi», - dep jazdy Finprom.kz portaly.

Portal málimetinshe, Qazaqstanda áıelderdiń Májilistegi (Parlamenttiń tómengi palatasy) ókildigi sońǵy 25 jylda ósip keledi jáne árqashan álemdik ortasha kórsetkishtiń aınalasynda boldy. Al 2012 jyly álemdik kórsetkishten 24 jyl ishinde ekinshi ret asyp tústi jáne sodan beri tómendegen joq. Degenmen, bul erler sanymen salystyrǵanda áli de az.

Mysaly, «Parlamentaralyq odaq» pen «BUU-áıelder» derekteri boıynsha, Qazaqstan 2021 jyly bir palataly Parlamentterdegi nemese Parlamenttiń tómengi palatasyndaǵy áıelderdiń úlesi boıynsha álemde tek 69-orynda tur. 2021 jyly 107 oryndyq Qazaqstan Parlamenti Májilisiniń depýtattyǵyna 29 áıel saılandy. Bul depýtattardyń jalpy sanynyń 27 paıyzyn quraıdy.

Forbes.kz málimetinshe, memlekettik qyzmettegi áıelderdiń úlesi 55 paıyzdy quraıdy. Degenmen, munda keıbir erekshelik bar. Shynynda da, memlekettik qyzmette áıelder kóp. Biraq olar negizgi emes ákimshilik qyzmetterdi atqarady. Ákimshilik qyzmette de basshy qyzmettegi áıelder óte az — bar bolǵany 4 paıyz.

Memlekettik saıası qyzmetshiler arasynda áıelderdiń úlesi 2021 jyly 9,1 paıyzdy qurady. 2000 jyldan beri bul kórsetkish nebári 0,3 paıyzdyq tarmaqqa ósti. Máslıhattardaǵy, jergilikti bılik organdaryndaǵy áıelderdiń úlesi de az.