Qazaqstan Saýd Arabııasynan qylmyskerlerdi aldyrtý joldaryn jeńildetti
Zań jobasy boıynsha jasaǵan baıandamasynda QR Bas prokýrorynyń orynbasary Andreı Lýkın Qazaqstan men Saýd Arabııasy Koroldigi arasyndaǵy kelisim 2016 jylǵy 25 qazanda Er-Rııadta jasalǵanyn eske salyp ótti.
Kelisimniń erejelerine sáıkes, taraptar ózderiniń aýmaǵyndaǵy ustap berýge ákep soǵatyn qylmystar úshin ekinshi taraptyń aýmaǵynda kúdik keltiriletin, aıyptalatyn nemese sottalǵan kez kelgen adamdy qylmystyq jaýaptylyqqa tartý men sot úkimin oryndaý maqsattarynda ustap berýge mindettenedi.
Atap aıtqanda kelisimde qylmystyq qýdalaý turǵysynda ustap berý nemese odan bas tartýdyń negizdemeleri qarastyrylǵan.
Osy rette eger de adam áskerı nemese saıası sıpattaǵy qylmystar úshin suraý jasalsa, qylmystyq jaýapkershilikke tartýdyń merzimi ótip ketken jaǵdaıda, egemendik pen ulttyq qaýipsizdikke zalal keltirgen kezde, qoǵamdyq tártip pen basqa da múddelerge keri áser etse nemese Konstıtýtsııaǵa qaıshy bolsa ustap berý sharalary júzege asyrylmaıdy.
«Qazirgi kezde Qazaqstannyń sot tóreliginen Saýd Arabııasy aýmaǵynda jasyrynyp júrgen adamdar joq, sondaı-aq atalǵan eldiń Qazaqstan aýmaǵynda da izdestirip jatqan adamdar anyqtalmady. Kelisim aldyn alý sıpatyna ıe ekenin eskere otyryp, bul qujat bolashaqta eki eldiń qylmystylyqpen kúres salasyndaǵy tıimdi yntymaqtastyǵyna jaqsy quqyqtyq negiz jasaıdy», - dedi Lýkın.
Onyń aıtýynsha, búginde Qazaqstan alys sheteldik eldermen ekijaqty 18 kelisimdi bekitti. TMD aıasynda kópjaqty konventsııa kúshine engen, ıaǵnı Mınsk jáne Kıshınev qujattary bar.
«Taıaý arada osy tektes halyqaralyq kelisimderge Brazılııamen, Iordanııamen, Makedonııamen, Grekııamen jáne Portýgalııamen qol qoıýdy josparlap otyrmyz», - dedi Bas prokýrordyń orynbasary.