Qazaqstan sarbazdary Olımpıadaǵa 14 lıtsenzııa jeńip alǵan

ALMATY. QazAqparat - Almatyda Qorǵanys mınıstrliginiń Sport komıteti – Ortalyq sport klýby bas jattyqtyrýshylarynyń keńesi ótti. Onda kelesi jylǵa arnalǵan josparlar qorytyndylandy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Baspasóz qyzmetinen málim bolǵanyndaı, búgingi kúni ortalyq sport klýbynyń shtattyq komandalaryn daıarlaý ortalyǵynyń 138 nusqaýshy sportshysy Qazaqstannyń ulttyq quramasyna kiredi.

Qıyn epıdemıologııalyq jaǵdaıǵa qaramastan, bul jyl sporttyq is-sharalarǵa baı boldy. Olarǵa qatysýdyń arqasynda armııa sportshylary 2021 jyly Tokıoda ótetin jazǵy Olımpıada oıyndaryna 14 lıtsenzııa jeńip aldy. Qysqy sport túrleri boıynsha 2022 jyly Beıjińde ótetin XXIV qysqy Olımpıada oıyndaryna Qazaqstan quramasy lıtsenzııalar jeńip alý úshin álem kýbogyna irikteýden sátti ótýde.

«Bıyl armııa sportshylary 18 respýblıkalyq jáne 11 halyqaralyq jarysqa qatysyp, 45 altyn, 36 kúmis jáne 40 qola medal jeńip aldy», – dep atap ótti Sport komıtetiniń tóraǵasy Aıtalap Qurǵambaev.

Keńes otyrysynda jyl qorytyndysy boıynsha kózge túsken áskerı qyzmetshi sportshylar, jattyqtyrýshylar men komanda bastyqtary maqtaý qaǵazdarymen marapattalyp, estelik syılyqtarmen marapattaldy.