Qazaqstan sarbazdary «Armı-2017» dodasynda kúshi myǵymdyǵymen tań qaldyrdy

ASTANA. QazAqparat - Ortalyq kommýnıkatsııalar qyzmetinde ««ARMI-2017» halyqaralyq áskerı oıyndarynyń qorytyndysy» taqyrybynda baspasóz máslıhaty bolyp ótti. Dodaǵa álemniń 29 elinen kelgen 150 áskerı komandanyń saıysyna 4 myńnan astam áskerı qyzmetshi qatysqan bolatyn, dep habarlaıdy «QazAqparat» HAA tilshisi.

Qazaqstan Qarýly kúshteri quramasy Armııa oıyndarynda jalpy komandalyq esepte Qytaı men Reseıdi alǵa jiberip, úshinshi oryndy ıelende. Máskeýdegi «Alabıno» polıgonynda saıys máresine jetken. Quramamyzdyń qorjynynda 3 altyn, 7 kúmis jáne 5 qola medal bar. Qazaqstan áskeriniń abyroıy úshin Armııa oıyndaryna qazaqstandyq 350 sarbaz qatysty.
 

«QR QK komandasy Qazaqstanda, Reseıde, Qytaıda, Ázerbaıjan men Belarýsta ótken 17 baıqaýǵa qatysty. Jalpy esepte, Qytaı men Reseıden keıin úshinshi oryn aldy. Tapsyrma oryndaldy. Komanda jasaqtaýǵa tyńǵylyqty daıyndaldyq. Áskerı qarýymyz da saqadaı saı edi. QR Qarýly kúshteri sońǵy 25 jylda joǵary deńgeıge jetti. Zamanǵa saı tehnıkalarymyz bar. Bir sózben aıtqanda saıysqa barlyq qurlyqtyń áskerıoleri keldi, 29 el qatysty. Qazaqstan bul saıysta baryn saldy. Men Máskeýde halyqaralyq qazylar alqasynyń múshesi boldym. Iá, keıde kelispeýshilikter de bolyp jatty. Biraq, ortaq til tabystyq. Mergender men tankishiler da jarady», - deıdi QK Bas shtaby bastyǵynyń birinshi orynbasary Ámir Halyqov.
 

Uıymdastyrýshylardyń bergen baǵasy boıynsha Qazaqstan komandasy kórneki quramalardyń biri bolǵan. «Armı-2017» saıysynda qazaqstandyq quramanyń sońǵysynda «Tanki bıatlonynan» oza shaýyp ózge elderdi tań qaldyrǵan eken. Onda tankishilerimiz 1 saǵat 45 mınýt 41 sekýnd nátıjesimen T-72 tankisiniń bazalyq modelinde joǵary mashyǵyn kórsetip, ekinshi oryn alǵan. Áskerı laýazymdy qyzmetkerler ozyq tankileri bar elderdi artta qaldyrǵan Qazaqstan tankishileriniń kúmisi altynǵa teń desedi.
 

«Biz armııa oıyndary aıasynda Belarýsta da saıysqa tústik. Baıqaý 9 jyl qatarynan ótýde. Armııa oıyndary 5 kezeńnen turdy. Jaýyngerlerden kásibı daǵdysy, mergendigi, dene daıyndyǵy, qaısarlyǵy men patrıottyǵy talap etildi. Bes kezeńnen turatyn saıysta úsh kezeńde birinshi, jalpy esepte ekinshi oryn aldy. Ár kezeń boıynsha bizdiń sarbazdar erekshe qımyl-áreketimen tań qaldyrdy. Kedergilerdi baǵyndyrý kezeńinde tipti basqa eldiń qatysýshylary bizdiń eldiń jaýyngerleriniń myǵymdyǵyna qarap «Sarbazdaryńa qandaı tamaq beresińder?» dep tań qaldy. Olardyń tipti qarqyny údeı túsken kezde tipti tań-tamasha qalǵan edi. Bul nátıjeni jaqsarta túskimiz keledi», - deıdi QR QK Bas shtaby serjanttar quramymen jumys basqarmasynyń bastyǵy Temirbek Halyqov.