Qazaqstan Respýblıkasynyń ınvestıtsııalyq daýlar jáne tórelik týraly zańnamanyń jańashyldyqtary talqylandy
Onyń jumysyna Prezıdent Ákimshiligi Basshysynyń orynbasary Marat Beketaev, memlekettik organdardyń birinshi basshylary, sýdıalar, Parlament depýtattary, Joǵarǵy Sot janyndaǵy Halyqaralyq keńes músheleri, memlekettik organdardyń, «Atameken» kásipkerlerdiń ulttyq palatasynyń, ulttyq damý ınstıtýttary men halyqaralyq zań fırmalarynyń ókilderi qatysty.
Іs-sharaǵa «Tengızshevroıl», «Lýkoıl», «Qazaqmys korporatsııasy», «Adjıp Karashyǵanaq B.V.», «Oral Oıl End Gaz», «Shubarkól kómir», «PetroQazaqstan Qumkól Resorsız», «SNPS-Aqtóbemunaıgaz», «SP KATKO», «Karachaganak Petroleum Operating B.V.» sııaqty iri ınvestorlardyń ókilderi shaqyryldy.
«Dóńgelek ústeldiń» ashylý rásiminde Joǵarǵy Sot Tóraǵasy Qaırat Mámı, Prezıdent Ákimshiligi Basshysynyń orynbasary Marat Beketaev, Energetıka mınıstri Qanat Bozymbaev, Investıtsııalar jáne damý mınıstri Áset Isekeshev, «Astana» Halyqaralyq qarjy ortalyǵynyń ákimshiligi» AQ basqarýshysy Qaırat Kelimbetov sóz sóıledi.
«Dóńgelek ústelde» sóılegen sózinde Joǵarǵy Sot Tóraǵasy: «Qazirgi zamanda ınvestıtsııalyq qyzmet kez-kelgen memlekettiń ekonomıkalyq ósýiniń mańyzdy alǵy sharty bolyp tabylady. Qazaqstan ınvestıtsııalyq tartymdylyqty arttyrýǵa aıryqsha mán berip otyr», - dep atap ótti.
«100 naqty qadam» Ult Josparynyń 23-qadamyn iske asyrý sheńberinde bıylǵy qańtardan bastap Joǵarǵy Sotta ınvestıtsııalyq daýlar boıynsha jeke sot isin júrgizilýde. Bul sot júıesiniń bıznes sýbektileri men ınvestorlardyń quqyqtaryn qorǵaýdy qamtamasyz etýdegi erekshe rólin aıǵaqtady. Atalǵan daýlardy qaraý tártibi jańa Azamattyq protsestik kodeks arqyly retteledi. Buǵan qosa, Joǵarǵy Sotta 12 bedeldi sheteldik jáne qazaqstandyq zańgerler men ǵalymdardan quralǵan Halyqaralyq keńes jumys isteýde.
Sonymen qatar, Q. Mámı óz sózinde qazirgi tańda daýlardy sheshýdiń balamaly túrleri, sonyń ishinde tórelik halyqaralyq tájirıbede keńinen qoldanylyp jatqanyna toqtaldy. Memleket basshysynyń tapsyrmasyna sáıkes, Qazaqstanda «Tórelik týraly» jańa zań ázirlenip, qabyldandy. Ol otandyq tórelikke kásipkerler men ınvestorlardyń qoljetimdiligin keńeıtýge baǵyttalǵan. Onda «Halyqaralyq saýda tóreligi týraly» ıÝNSITRAL tıptik zańynyń qaǵıdattary eskerilgen.
«Dóńgelek ústel» jumysy eki sessııa boıynsha ótti.
Birinshisi - «Investıtsııalyq daýlarǵa qatysty sot isin júrgizýdegi zańnamalyq jańashyldyqtar» dep atalady.
Atalǵan sessııanyń sheńberinde ınvestıtsııalyq daýlardy sheshýdiń máseleleri men keleshegi, ınvestorlardyń mártebesin anyqtaý, ınvestıtsııalardy quqyqtyq qorǵaýdy qamtamasyz etýdegi ýákiletti memlekettik organdardyń róli, salyq daýlary boıynsha sotqa deıingi apellıatsııanyń tetikterin qaıta qaraý, jer qoınaýyn paıdalaný týraly zańnama boıynsha máseleler qaraldy.
Sonymen qatar, ınvestorlardyń qatysýymen bolatyn daýlar boıynsha qazaqstandyq sottardyń ıýrısdıktsııasy týraly Joǵarǵy Sot janyndaǵy Halyqaralyq keńes múshesi Kýrtıs Masters baıandady.
Ekinshi sessııa - «Tórelik týraly zańnamanyń jańashyldyqtary» taqyrybynda ótti.
Atalǵan sektsııanyń sheńberinde «Tórelik týraly» Qazaqstan Respýblıkasynyń jańa zańynyń normalary talqylandy. Azamattyq daýlardy tıimdi sheshý maqsatynda qazaqstandyq sottar men tórelikterdiń ózara is-áreketin jaqsartýǵa erekshe mán berildi.
«IUS» halyqaralyq tórelik tóraǵasynyń orynbasary Igor Greshnıkov Qazaqstan Respýblıkasy men Reseı Federatsııasynyń ınstıtýtsıonaldyq tóreliktiń damý bolashaǵy men tájirıbesi týraly sóz sóıledi. Halyqaralyq fırmalar ókilderi óz baıandamalarynda tórelik týraly zańnamadaǵy jańa jańashyldyqtar men tórelik sheshimderiniń oryndalýy týraly aıtty. Buǵan qosa, jańa zań sheńberindegi kommertsııalyq tórelik jáne ınvestorlardy tórelikte qorǵaýdyń ózekti máseleleri boıynsha egjeı-tegjeıli aqparat usynyldy.
«Dóńgelek ústel» barysynda qatysýshylar baǵdarlamada kózdelgen barlyq máseleler boıynsha syndarly pikir almasty. Іs-sharanyń qorytyndysy boıynsha tıisti usynymdar ázirlendi.
Aıta keteıik, Memleket basshysy Nursultan Nazarbaev jarııa etken 5 ınstıtýtsıonaldyq reformany júzege asyrý boıynsha 100 naqty qadam - Ult josparynda quqyq tártibi jáne zańdylyq máselesine erekshe nazar aýdarylǵan.
Ult josparynda: «Ekinshi reformanyń máni táýelsiz sot tóreligi men Qazaqstannyń búkil quqyq qorǵaý júıesiniń tek qana azamattardyń quqyqtary men bostandyqtaryn qamtamasyz etýge, zańdardy qatań oryndaýǵa jáne quqyq tártibin nyǵaıtýǵa baǵyttalýy tıistiginde.
Ony zańnamalyq turǵydan qamtamasyz etý aıasynda jańa Azamattyq is júrgizý kodeksi men jańa «Joǵary Sot Keńesi týraly» Zań qabyldandy. «Sot júıesi jáne sýdıalardyń mártebesi týraly» Konstıtýtsııalyq zańǵa, Qylmystyq-is júrgizý kodeksine jáne Ákimshilik quqyq buzýshylyq týraly kodekske qajetti ózgerister engizildi.
Bárinen buryn, jańartylǵan zańnamalar qoǵamnyń sot júıesine senimin arttyrýǵa yqpal etetin bolady. Ádildik naq sotta saltanat quratyny belgili.
Qazaqstan sottaryn reformalaýdaǵy temirqazyq másele - sapaly sýdıalar korpýsyn jasaqtaý.
Sýdıalyqqa kandıdattardy irikteýdiń qatań tetigi men olarǵa qoıylatyn joǵary biliktilik talaptary zań turǵysynan qarastyrylǵan.
Sot tóreligin úlken ómirlik tájirıbesi bar jáne joǵary moraldyq ustanymdarǵa ıe eń laıyqty ári barynsha daıyndalǵan kásibı sheberler júzege asyrýlary tıis.
Sýdıalardy irikteý men taǵaıyndaý úderisteri qoǵam úshin móldir jáne ashyq bolady.
Osymen baılanysty óziniń apparaty bar, quramy men ókilettiligi keńeıtilgen avtonomdy memlekettik mekemege aınalatyn Joǵary Sot Keńesi túbegeıli reformalandy.
Sot reformasynyń mańyzdy qyry - sot tóreliginiń bes satyly júıesinen úsh býyndy júıesine ótý.
Tek birinshi, apellıatsııalyq jáne kassatsııalyq ınstantsııalar qalady. Bul jerde kóp is qaralatyn birinshi jáne apellıatsııalyq ınstantsııalar sottarynyń rólderi aıtarlyqtaı kúsheıtiletin bolady. Mundaı qadam sottyq áýre-sarsańnyń aldyn alyp, sot sheshimin qabyldaýdyń merzimin qysqartady.
Qazaqstandaǵy sot tóreligi azamattardyń jeke ómiriniń qupııalyǵyna kepil quqyn esepke ala kelgende barynsha ashyq bola túsedi.
Sot zaldary sot isterin aýdıo jáne vıdeojazýdyń apparatýralarymen jaraqtandyrylady jáne jazbalardy qandaı da bir toqtatýǵa nemese redaktsııalaýǵa múmkindik berilmeıdi.
Bul sýdıalardy jáne sot májilisine basqa da qatysýshylardy tártipke shaqyrady, sot protsesi men sot qabyldaǵan sheshimniń obektıvtiligin qamtamasyz etedi.
Sot júıesin reformalaý sheńberinde birqatar ınstıtýttyq sheshimder jumys isteı bastaıdy.
Birinshiden, Joǵarǵy Sot janyndaǵy Sot jıýrıi túbegeıli qaıta qurylady.
Sot jıýrıi azamattardyń sýdıalardyń is-áreketine jáne sýdıalyq korpýs ókilderiniń qabyldanady dep kútilip otyrǵan Etıkalyq kodeksti buzý jaǵdaılaryna baılanysty aryz-shaǵymdaryn qaraıtyn bolady.
Ekinshiden, Joǵarǵy Sot janynan daýlardy, onyń ishinde, iri ınvestorlar qatysatyn daýlardy qaraý úshin mamandandyrylǵan alqa qurylatyn bolady.
Onyń sheńberinde shetel ınvestorlarynyń quqyn ózderinde týyndaǵan quqyqtyq daýlar boıynsha sapaly ári ádil sheshý júzege asyrylady.
Úshinshiden, qylmystyq is júrgizý sheńberinde sottarda, onyń ishinde sotqa deıingi kezeńde, aıyptaý men qorǵaý arasynda teńgerim qamtamasyz etiletin bolýy tıis.
Buǵan adamnyń konstıtýtsııalyq quqy men bostandyǵyn shekteıtin tergeý sýdıasynyń barlyq tergeý áreketin sanktsııalaý boıynsha ókilettilikterin odan ári qaraı keńeıtý esebinen qol jetkiziletin bolady.
Tórtinshiden, qazaqstandyq sottardyń tóraǵalary - quqy teńderdiń ishindegi joly keńderi ekenin umytpaý mańyzdy.
Sondyqtan olardyń tarapynan basqa sýdıalar qabyldaıtyn sheshimge yqpal etý múmkindigi múldem bolmaıdy.
Besinshiden, memlekettik sot oryndaýshylaryn kezeń-kezeńimen qysqartý arqyly jeke sot oryndaýshylarynyń ınstıtýty odan ári damytylady.
Sot júıesiniń táýelsizdigin nyǵaıtatyn sharalardyń mańyzy erekshe.
Meniń tapsyrmam boıynsha búginde qurmetti zeınetke shyqqan sýdıalardy zeınetaqylyq qamtamasyz etý boıynsha barlyq máselelerin sheshýdi qarastyratyn zań qabyldanǵany belgili. Bul sýdıalarǵa bar kúsh-jigerin sot tóreligin barynsha obektıvti atqarýǵa aýdarý múmkindigin beredi.
Budan bólek, bizge barlyq quqyq qorǵaý organdarynyń jáne bárinen buryn polıtsııanyń adamdardyń múddesi men quqyqtyq tártipti nyǵaıtý qyzmetinde turýyna qol jetkizýimiz qajet.
Bul úshin jergilikti bılik organdary men jergilikti qoǵamdastyqtarǵa esep beretin jergilikti polıtsııa qyzmeti qurylady. Osyndaı qyzmet tutastaı Ekonomıkalyq yntymaqtastyq jáne damý uıymyna múshe birqatar elderde ózin jaqsy tanytty.
Jergilikti polıtsııa qyzmetiniń qaraýyna qoǵamdyq tártip kúzeti, turmystyq qylmysqa qarsy turý, jol qaýipsizdigin qamtamasyz etý men usaq quqyq buzýshylyqtarǵa atymen tózbeýshilik máseleleri berilip otyr.
Osy jańalyqtar jańa zańnamada kórinis tapqan. Onda, sondaı-aq, azamattardyń etıkalyq normalardy buzǵan polıtsııalardyń ústinen túsirgen aryz-shaǵymdaryn qaraıtyn qoǵamdyq keńester men ózge de konsýltatıvtik-keńestik organdar júıesin qurý qarastyrylǵan.
Sondaı-aq, «Qylmystyq quqyq buzýshylyq kartasy» ınternet-portaly qurylatyn bolady. Mundaı tetik álemniń birqatar elderinde tabysty qoldanylyp keledi. Osy veb-resýrsqa eldegi barlyq qylmystyq quqyq buzýshylyqtar jedel engiziledi. Bul jurtshylyqtyń quqyq qorǵaý organdary jumysynyń tıimdiligin baqylaýyna múmkindik beredi.
Penıtentsıarlyq júıeni jaqsartý kókeıkesti másele bolyp tabylady. Bul jumys memlekettik-jekemenshik áriptestigin damytý sheńberinde júrgizilýi tıis.
Shetelderdiń tabysty tájirıbeleri jeke sektordy penıtentsıarlyq mekemelerdi salý men paıdalanýǵa tartý jónindegi sharalardy júzege asyrýdyń negizi bolýy tıis.
Sondaı-aq, buǵan deıin zańnan attap, sonysy úshin jazasyn ótegen adamdarǵa kómek kórsetý men yqpal etý mańyzdy.
Bul úshin áleýmettik ońaltý keshendi damytylyp, jazasyn ótep jatqan azamattar úshin arnaıy áleýmettik qyzmet kórsetý standarttary engiziletin bolady.
Tutastaı alǵanda, Qazaqstanda quqyqtyq memlekettiń ornyqtyrylýy - birtutas jańǵyrtý úderisi aıasynda sheshilip jatqan bizdiń konstıtýtsııalyq mindetimiz. Belgilengen sharalar men qadamdardy júzege asyrý azamattardyń, sondaı-aq, shetel ınvestorlarynyń ulttyq sot jáne quqyq qorǵaý júıesine senimin arttyryp, tutastaı alǵanda, elimizdegi bıznes-ahýaldy jaqsartady» delingen.