«Qazaqstan Respýblıkasynyń Ardagerler uıymy» RQB ortalyq keńes tóraǵasynyń mindetin atqarýshy bolyp Ó.Ozǵanbaev saılandy

ASTANA. 27 aqpan. QazAqparat - Búgin ótken «Qazaqstan Respýblıkasynyń Ardagerler uıymy» respýblıkalyq qoǵamdyq birlestiginiń ortalyq keńesiniń prezıdıým otyrysynda uıymdastyrý jaǵynan birqatar máseleler qaraldy, dep habarlady birlestiktiń baspasóz qyzmetinen.

Atap aıtqanda, 2009 jyldan beri uıymdy basqaryp kelgen birlestiktiń ortalyq keńesiniń tóraǵasy Qaıyrbek Súleımenovtiń Parlament Májilisindegi belsendi zań shyǵarmashylyq qyzmetine baılanysty atqaryp otyrǵan qyzmetinen bosatý týraly ótinishi qoldaý tapty.

Prezıdıým músheleri biraýyzdan daýys berý arqyly Ómirzaq Ozǵanbaıuly Ozǵanbaevty ortalyq keńes tóraǵasynyń mindetin atqarýshy retinde saılady jáne onyń kandıdatýrasyn ortalyq keńes plenýmynyń qaraýyna usyný týraly sheshim qabyldady, plenýmda ony Qazaqstan Respýblıkasy Ardagerler uıymy ortalyq keńesiniń tóraǵasy laýazymyna bekitý týraly másele qaralady.

Ómirzaq Ozǵanbaevtyń basshylyq laýazymdardaǵy tájirıbesi mol, Qazaqstan Respýblıkasy Joǵary Keńesiniń depýtaty, Qazaqstan Respýblıkasy Parlamenti Senatynyń depýtaty bolyp saılanǵan.