Qazaqstan reseılikter eń kóp baratyn elderdiń bestigine endi

NUR-SULTAN. QazAqparat – Qazaqstan Respýblıkasy reseılikter 2019 jyly kóp saparlaǵan TOP-5 eldiń qataryna endi. Bul týraly «TýrStat» reseılik týrıstik portaly málim etti, dep habarlaıdy QazAqparat tilshisi.

Portaldyń habarlaýynsha, reseılik týrıster bıylǵy birinshi jartyjyldyqta eń kóp barǵan elderdiń ondyǵy tómendegideı (2018 jylmen salystyrǵandaǵy statıstıkamen birge):

1. Túrkııa, 2,649 myń sapar (+16%), +368 myń sapar;

2. Abhazııa, 1,852 myń sapar (+6%);

3. Fınlıandııa, 1,644 myń sapar (+5,5%), +85 myń sapar;

4. Qazaqstan, 1,371 myń sapar (+6,5%), +84 myń sapar;

5. Qytaı, 1,077 myń sapar (+19%), +169 myń sapar;

6. Ýkraına, 1,057 myń sapar (-2%), -17 myń sapar;

7. Estonııa, 847 myń sapar (-1%), -11 myń sapar;

8. Taıland, 654 myń sapar (-4%), -25 myń sapar;

9. Grýzııa, 630 myń sapar (+30%), +147 myń sapar;

10. Germanııa, 628 myń sapar (+6%), +37 myń sapar.

TýrStattyń málimetine qaraǵanda, Túrkııa men Qytaı reseılikter bıyl eń kóp barǵan elder.

Túrkııaǵa bıyl 368 myń reseılik týrıst artyq barǵan. Sol sekildi Qytaı (+169 myń), Grýzııa (+147 myń), Italııa (+96 myń), Fınlıandııa (+85 myń), Qazaqstan (+84 myń), Chernogorııa (+46 myń), Ispanııa (+30 myń), Armenııa (+30 myń) men Frantsııaǵa (+25 myń) barǵysy keletin RF azamattarynyń sany artyp keledi.

Reıtıng Reseıdiń jyl basynan bergi týrıstik statıstıkasyna súıenip jasaldy.