Qazaqstan Reseıge Kaspıı ıtbalyǵyn saqtaý úshin erekshe qorǵalatyn aýmaq qurýdy usyndy
Bul jaıynda QR Ekologııa, geologııa jáne tabıǵı resýrstar mınıstrliginiń Telegram paraqshasynda jarııalanǵan aqparatta aıtylǵan, dep habarlaıdy QazAqparat tilshisi.
«Qazaqstannyń Ekologııa, geologııa jáne tabıǵı resýrstar mınıstri Maǵzum Myrzaǵalıev Reseıge jumys sapary barysynda Jaıyq ózeniniń gıdrologııalyq rejımin zertteý úshin birlesken sarapshylyq top qurý, basseınniń ekojúıesin saýyqtyrý baǵdarlamasyn qurý múmkinshiligin, sonymen qatar Kaspıı ıtbalyǵy men kıikterdiń popýlıatsııasyn saqtaý máselelerin talqylady. M.Myrzaǵalıev bul máselelerdi RF Tabıǵı resrýstar jáne ekologııa mınıstri Dmıtrıı Kobylkınmen kezdesýi barysynda qozǵady», - delingen taratylǵan aqparatta.
Qazaqstannyń bas ekology reseılik áriptesin Jaıyq ózeniniń gıdrologııalyq rejımin birlesip zertteýge kúsh-jiger jumyldyrýǵa, ony odan ary jaqsartý úshin keshendi sharalar ázirleýge úndedi.
«Vedomstvolarymyzdyń arasynda Jaıyq ózeniniń qazirgi gıdrologııalyq rejımin zertteýdi uıymdastyrý boıynsha birlesken jumys tobyn qurý jáne tıisinshe tehnıkalyq mindetter ázirleý qajet. 2020 jyldyń naýryzynda taraptardyń sarapshylary birlesken zertteý júrgizýge kirise alady», - dedi kezdesý barysynda M.Myrzaǵalıev.
Sonymen qatar ol árbir taraptyń sarapshylar quramyn jasaqtaýǵa shaqyrdy.
Taraptardyń kelesi kezeńde óńirdiń qorshaǵan ortasynyń jaı-kúıin zerdeleýge kirisýi jáne Jaıyq ózeni basseıniniń ekojúıesin saýyqtyrý baǵdarlamasyn ázirleýi josparlanǵan.
Munan bólek Maǵzum Myrzaǵalıev reseılik tarapqa Kaspıı ıtbalyǵy mekendeıtin jerdi saqtaý úshin transshekaralyq erekshe qorǵalatyn tabıǵı aýmaq qurýdy usyndy.
Qazaqstan men Reseıdiń tabıǵatty qorǵaý vedomstvolarynyń basshylary kıikterdiń popýlıatsııasyn saqtaý máselelerin talqylady.