Qazaqstan Reseıdiń ishki sý joldarymen tranzıttik tasymal kólemin 300 myń tonnaǵa jetkizbek
«Atalǵan kelisim Eýrazııalyq ekonomıkalyq odaqqa qatysýshy memleketter arasynda jasaldy. Kelisimniń negizgi erejeleri, kelesige baǵyttalǵan. Birinshiden - taraptardyń ishki sý joldary boıynsha kemelerdiń tranzıttik ótýine ruqsat berý tártibin jeńildetý. Atap aıtqanda, kelisimde tranzıttik ótýge arnalǵan ótinimdi qaraý merzimi – 10 kún jáne ruqsatty ýákiletti organ RF Kólik mınıstrlig bolyp belgilenedi. Kelisimge qatysýshy elderdiń ishinde kemelerdiń tranzıttik júzýi tek Reseıdiń ishki sý joldarymen júzege asyrylady.
Qazirgi kezde tranzıttik ótýge ruqsatty Reseı Federatsııasynyń Úkimeti beredi jáne osy ruqsatty alý 3 aıdan 6 aıǵa deıingi merzimdi qamtıdy. Negizinen júkter Qara teńiz porttarynan qazaqstandyq Aqtaý, Quryq, Baýtıno, Atyraý porttaryna Edil (Volga)-Don kanaly arqyly jetkiziledi», - dedi Senattyń jalpy otyrysynda zań jobasy boıynsha baıandamaǵan jasaǵan QR Indýstrııa jáne ınfraqurylymdyq damý vıtse-mınıstri Berik Kamalıev.
Onyń atap ótýinshe, Reseıdiń ishki sý joldary arqyly tek qazaqstandyq kompanııalardyń jeńildetilgen tártippen ótý múmkindigi bolǵandyqtan qazirgi ýaqytta Eýrazııalyq odaqqa múshe emes Kaspıı mańy elderi Ázerbaıdjan, Iran, Túrikmenstannyń Kaspıı porttarynan Qara teńiz porttaryna júkterdi tasymaldaý úshin qazaqstandyq «Qazaqteńizkólikfloty», «OMS shipping» tasymaldaýshylardy tartýǵa daıyn ekendigin bildirip otyr.
«Bizdiń Aqtaý jáne Quryq porttarynyń Transkaspıı halyqaralyq kólik marshrýty boıynsha qabilettiligi artatyn bolady. Kelisimdi qabyldaýdyń arqasynda Reseıdiń ishki sý joldarymen tranzıttik tasymal kólemin 2025 jylǵa qaraı shamamen 250-300 myń tonnaǵa arttyrý kózdep otyrmyz, - dedi ol.