Qazaqstan Reseıden AI-95 benzınin ımporttaýǵa májbúr

ASTANA. QazAqparat –Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda eldegi janarmaı qorynyń naqty kólemin atady, dep habarlaıdy QazAqparat tilshisi.

«Búgingi saǵat 9.00-degi jaǵdaı boıynsha bizde AI-92 markaly benzınniń qory 23 kúnge jetedi. AI-95 markaly benzınniń qory –15 kúnge, dızeldiń qory 29 kúnge jetedi», - dedi vedomstvo basshysy.

Mınıstr janarmaı tapshylyǵy týyndaǵan jaǵdaıda onyń baǵasyn qoldan qymbattatý, alyp-satý áreketteri jıileıtinin eske salyp, bul baǵytta tıisti sharalar qabyldanyp jatqanyn atap ótti.

«AI-95 markaly benzınnen basqa qandaı da bir janarmaıdyń baǵasynyń kúrt ósýin boldyrmaımyz dep oılaımyn. Óıtkeni ony Reseıden ımporttaýǵa týra keledi. Qazir AI-95 markaly benzınniń qory 15 táýlikke jetedi. Pavlodar munaı zaýytyndaǵy jóndeý jumystaryna baılanysty, Atyraý munaı óńdeý zaýytyndaǵy aqaýǵa baılanysty, Shymkent zaýytynyń AI-95 markaly benzınniń óndiris kólemin azaıtýyna baılanysty naryq qajettiligin Reseı Federatsııasynan aldyratyn ımport arqyly ǵana tolyq jabamyz dep kútip otyrmyz. Reseımen tıisti kelissóz júrgizip jatyrmyz. Bizge shamamen 40 myń tonnadaı AI-95 markaly benzın ımporttaý qajet. Kelissóz júrip jatyr. Qazir «Gazprom neft» jetkize bastady», - dedi Almasadam Sátqalıev.

Eske salaıyq, birer kún buryn Energetıka mınıstrligi Qazaqstannyń iri janar-jaǵarmaı quıý beketteri Reseıden benzın ımporttaý máselesin pysyqtap jatqanyn málimdegen bolatyn.