Qazaqstan Reseıdegi janar-jaǵarmaı tapshylyǵyna baılanysty munaı ónimderin Túrkimenstan men Ázerbaıjannan ákelmek

ASTANA. QazAqparat - Qazaqstan janar-jaǵarmaıdy Túrkimenstan men Ázerbaıjannan ákelý múmkindikterin qarastyryp jatyr. Bul týraly búgin Ortalyq kommýnıkatsııalar qyzmetinde ótken brıfıngte QR Energetıka vıtse-mınıstri Uzaqbaı Qarabalın aıtty.

«QazMunaıGaz» birqatar kelissózder júrgizdi, qazirde ázerbaıjandyq «SOKAR» kompanııasynan jáne Túrkimenstannan janar-jaǵarmaı tasý múmkindikteri talqylanyp jatyr», - dep atap ótti vıtse-mınıstr.

Onyń aıtýynsha, Reseıde qazir janarmaı eksporttaý salasynda úlken qıyndyq týyndap otyr. Óıtkeni, jýyrda «Rosneft» kompanııasyna qarasty Achınsk munaı óńdeý zaýytynda úlken apat oryn alǵan bolatyn. Sonymen qatar, taǵy birneshe reseılik zaýyttar óz jumysyn toqtatqan. «Reseıdiń keıbir zaýyttary kúzdik-josparlyq jóndeý jumystaryna baılanysty jumys istemeı tur. balansta turǵan janarmaıynyń da jetispeýiniń ózindik sebepteri bar dep oılaımyz. Sebebi olardyń janarmaımen qamtamasyz etýi tıis óńirler paıda boldy. Men bul jerde Qyrymdy aıtyp otyrmyn. Mine, osyndaı jaǵdaılarǵa baılanysty búgingi tańda Reseı naryǵynda shetelderge, sonyń ishinde Qazaqstanǵa janar-jaǵarmaı eksporttaý máselesinde birqatar qıyndyqtar týyndady», - dep túsindirdi vıtse-mınıstr.