Qazaqstan, Reseı jáne Belarýs Prezıdentteri mamyrda EEO týraly kelisimge qol qoıady

ASTANA. QazAqparat - Qazaqstan, Reseı jáne Belarýs Prezıdentteri mamyrda EEO týraly kelisimge qol qoıady dep kútilýde. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Qarjy mınıstrligi Salyq komıtetiniń tóraǵasy Ánýar Jumadildaev málim etti.

«Ózderińizge málim, Elbasy Nursultan Nazarbaevtyń strategııalyq bastamalarynyń biri - Eýrazııalyq odaq ıdeıasyna bıyl 20 jyl toldy. Osy ýaqyt aralyǵynda Qazaqstan, Reseı, Belarýs memleketteri arasyndaǵy ıntegratsııalyq ıgilikter tıisti damý satysynan ótti. Aldaǵy mamyr aıynda úsh eldiń basshylary Eýrazııalyq ekonomıkalyq odaq týraly kelisimge qol qoıady dep kútilýde», - dedi ol.

Komıtet basshysynyń atap ótýinshe, Eýrazııalyq ıntegratsııa memleketterdiń ózara ekonomıkalyq qarym-qatynas máselelerin ǵana qamtıdy.

«Sondyqtan, bul oraıda salyqtyq ákimshilendirý máseleleri de erekshe oryn alatynyn atap ótkim keledi», - dedi Á.Jumadildaev.