Qazaqstan Reseı tarapynan Kaspıı teńizinde oryn alǵan oqıǵaǵa qatysty verbaldy nota alǵanyn qýattaıdy

ASTANA. 29 qarasha. QazAqparat - Qazaqstan Reseı tarapynan Kaspıı teńizinde reseılik brakonerler men qazaqstandyq shekarashylar arasynda oryn alǵan oqıǵaǵa qatysty verbaldy nota alǵanyn qýattaıdy. Bul týraly búgin QR SІM resmı ókili Janbolat Úsenov málim etti.

QR Syrtqy ister mınıstrligi Reseı Federatsııasynyń Syrtqy ister mınıstrliginen Kaspıı teńizinde reseılik brakonerler men qazaqstandyq shekarashylar arasynda oryn alǵan oqıǵaǵa qatysty verbaldy notany alǵanyn rastaıtyndyǵyn atap ótken resmı ókil bul suranysqa jaýap reseılik tarapqa belgilengen tártip boıynsha joldanatyndyǵyn basa aıtty. «Osy turǵyda, atalǵan oqıǵa Qazaqstan Respýblıkasynyń «Memlekettik shekara» týraly Zańyna sáıkes, Qazaqstannyń aýmaǵy bolyp tabylatyn 12 mıldik teńiz aımaǵynda oryn alǵandyǵyn atap ótkimiz keledi. Osylaısha, QR shekara qyzmeti ókilderiniń áreketteri bizdiń elimizdiń memlekettik şekarasyn qorǵaýǵa baǵyttalǵan bolatyn. Qazaqstan óz shekarasynyń myzǵymastyǵyn, zańnamasynyń saqtalýyn jáne óz ulttyq múddeleriniń buzýshylardyń azamattyǵyna qaramastan barlyq zańdy joldarmen qorǵalýyn qamtamasyz etýde jáne keleshekte de qamtamasyz etedi»,- dedi ol. Sonymen qatar, resmı ókil ustalǵandarǵa qatysty baspasóz quraldarynyń taratqan aqparattary shyndyqqa janaspaıtynyn jáne olar «balyqshylar» emestigin erekshe atap ótti. «Olar Qazaqstan Respýblıkasy quqyq qorǵaý organdary ókilderiniń zańdy talaptaryna ádeıi baǵynbaǵan, erekshe qorǵalatyn qoryq aýmaǵynda brakonerlik ispen aınalysqan memlekettik shekarany buzýshylar bolyp tabylady», - dedi J.Úsenov.