Qazaqstan-Reseı shekarasynda PTR anyqtamasy joq 14 adam karantınge jatqyzyldy

PAVLODAR. QazAqparat – Pavlodardyń Ertis mańyndaǵy memlekettik shekaradan bir táýlik ishinde 336 adam ótti. Sonyń ishinde 14 adam karantınge jatqyzyldy, dep habarlaıdy QazAqparat.

«PTR anyqtamasy joq eki azamatqa, Ózbekstan jáne Qyrǵyzstan turǵyndaryna elge kirýge tyıym salyndy», - dep habarlady aımaqtyq sanıtarlyq-epıdemıologııalyq qadaǵalaý departamentinen. Vedomstvonyń málimetinshe, Pavlodar oblysyndaǵy memlekettik shekaradaǵy avtomobılderdi ótkizý beketterinde adamdardyń oryn aýystyrý monıtorıngi jalǵastyrylyp jatyr. Táýlik ishinde shekaradan 336 adam ótken, onyń ishinde 252 jaıaý adam jáne 84 fýra júrgizýshi bar. «Karantın statsıonaryna 14 adam jatqyzyldy. Táýlik ishinde kólik ótkelderinde vırýsy rastalǵan oqıǵalar bolǵan joq», - deıdi vedomstvodan.

Shekteý engizilgennen beri Pavlodar oblysyna 102 587 adam kelgen, sonyń ishinde halyqaralyq tasymalmen aınalysatyn 61 870 júrgizýshi jáne 40717 jolaýshy bar.

Qazaqstannyń rezıdenti emes, anyqtamasy bolmaǵan 1327 azamatqa shekaradan ótýge tyıym salynǵan. Osy ýaqytqa deıin barlyǵy 26096 PTR test jasalyp, aýrý belgileri bolmaǵan, syrttan ákelingen 189 oqıǵa anyqtaldy.

«Karantın statsıonaryna PTR-zertteý júrgizý úshin Qazaqstannyń 3036 azamaty jatqyzyldy» dep túıindedi epıdemıolog mamandar.