Qazaqstan QazVac-ty ózge elderde tirkeý jumysyn jalǵastyrýda

NUR-SULTAN. QazAqparat – Qazaqstan QazVac-ty ózge elderde tirkeý jumysyn jalǵastyryp jatyr. Bul týraly Prezıdent janyndaǵy Sheteldik ınvestorlar keńesiniń 34-shi jalpy otyrysynda Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Úkimet sheteldik seriktesterimen kelissóz júrgizdi. Qazirgi ýaqytta qupııalylyq týraly kelisimge qol qoıyldy. Sonymen qatar otandyq QazVac vaktsınasyn qyzyǵýshylyq tanytqan elderde ilgeriletý maqsatynda qujattardy toltyrý jumysy qolǵa alynǵan. Buǵan qosa, QazVac-ty qyzyǵýshylyq tanytqan memleketterde tirkeý jumysy jalǵasyp jatyr», - dedi Baqyt Sultanov.

Mınıstr Qazaqstan Respýblıkasynda ǵylymdy damytýdyń 2025 jylǵa deıingi tujyrymdamasy ázirlenip jatqanyn aıtty. Atalǵan qujatta halyqaralyq tehnologııalyq kompanııalarda jumys isteıtin qazaqstandyqtardy, repatrıanttardy, burynǵy Qazaqstan azamattaryn izdeý, olardyń Otanyna oralýy úshin qolaıly jaǵdaı jasaý algorıtmi qarastyrylady.

«Vıza alýǵa arnalǵan qoldaýhat berý merzimi 5-ten 3 jumys kúnine deıin qysqardy. Vızalyq portal arqyly birrettik E-ınvestorlyq vıza rásimdeý qyzmeti júzege asyryldy. Buǵan qosymsha, ınvestorlyq vıza ıelerin jergilikti atqarýshy organdar jumys isteýge ruqsat talap etpeıtin tulǵalar tizimine qosý jumysy júrgizilip jatyr. Tolyqtaı alǵanda, barlyq memlekettik organ hattamalyq tapsyrmalardy oryndaý jónindegi qajetti is-sharalardy qabyldady», - dedi ol.