Qazaqstan Prjevalskıı jylqylaryn jersindirýdi qolǵa almaq

ASTANA. QazAqparat – QR Ekologııa jáne tabıǵı resýrstar mınıstrligi (QR ETRM) men Praga zoobaǵy arasynda Prjevalskıı jylqylaryn jersindirý boıynsha kelisim jasaldy, dep habarlaıdy QazAqparat.

QR ETRM-niń baspasóz qyzmetinen málim etkendeı, qujatqa Astana qalasynda ótken Qazaqstan-Chehııa bıznes-forýmy aıasynda qos el Úkimet basshylarynyń qatysýymen qol qoıyldy.

Qazaqstan tarapynan memorandýmǵa Orman sharýashylyǵy jáne janýarlar dúnıesi komıtetiniń tóraǵasy Nurlan Qylyshbaev, Chehııa tarapynan Praga haıýanattar baǵynyń dırektory Mıroslav Bobek qol qoıdy.

«Janýarlardy jersindirý degenimiz – olardy burynǵy mekendeý oryndaryna qaıta kóshirý.

Byltyrǵy jyldyń jeltoqsan aıynda Chehııa tarapymen, sondaı-aq Zoologııa ınstıtýty, Qazaqstandaǵy bıoalýantúrlilikti saqtaý qaýymdastyǵy ókilderiniń qatysýymen kezdesý ótti. Onyń qorytyndysy boıynsha «Altyn Emel», «Kólsaı-kólderi» memlekettik ulttyq tabıǵı parkteri men «Altyn dala» memlekettik tabıǵı rezervaty Prjevalskıı jylqysyn jersindirýge potentsıaldy aýmaq retinde tańdaldy.

Atalmysh memorandýmǵa qol qoıý elimizdegi jabaıy tabıǵatty qorǵaý salasyndaǵy ózara yntymaqtastyqty keńeıtýge jáne sol arqyly janýarlar áleminiń joıylyp bara jatqan túrlerin saqtaýǵa múmkindik beredi», - delingen Orman sharýashylyǵy jáne janýarlar dúnıesi komıtetiniń málimetinde.