Qazaqstan Prezıdentiniń BUU Bas Assambleıasyndaǵy sózine qandaı álemdik BAQ nazar aýdardy
Amerıkanyń kúndelikti jaryq kóretin The Washington Post gazeti «BUU basshysy álemniń orasan zor jahandyq áreketsizdikpen tejelgenin málimdedi» degen maqalasynda Qazaqstan basshysynyń «Jahandyq sanktsııalardyń taralýy, Reseı men Amerıka Qurama Shtattary sııaqty iri derjavalar arasyndaǵy básekelestiktiń janama ónimi jahandyq jetkizilim tizbegi, baǵa jáne azyq-túlik qaýipsizdigi problemalarynyń ishinara sebebi bolyp sanalady. Qaýipsizdik arhıtektýrasy buzylýda. Álemdik derjavalar arasyndaǵy ózara senimsizdik tereńdeı túsýde» degen sózin keltiredi.
USAID-tiń resmı saıtynda USAID ákimshisi Samanta Paýerdiń Qazaqstan Prezıdenti Qasym-Jomart Toqaevtpen kezdesýi atalyp ótken.
Taraptar Qazaqstannyń ekonomıkalyq jańǵyrýyn jedeldetýdi, azamattyq qoǵamdy qoldaýdy jáne Prezıdent Qasym-Jomart Toqaevtyń reformalar baǵdarlamasynda baıandalǵan protsester men maqsattardy ilgeriletýdi, sonyń ishinde ınklıýzıvti jáne yqylasty demokratııalyq basqarýdy keńeıtýdi qosa alǵanda, AQSh pen Qazaqstan arasyndaǵy ekijaqty áriptestiktiń negizgi basymdyqtaryn talqylady.
Anadolu Agency aqparattyq agenttigi «Qazaqstan Prezıdenti básekelestiktiń kúsheıýine, ıadrolyq memleketterdiń rıtorıkasyna qatysty dabyl qaǵýda» atty maqalany jarııalady.
Maqalada Qasym-Jomart Toqaevtyń BUU-daǵy «Biz eki býynnan keıin alǵash ret ıadrolyq qarýdyń qoldanylý qaýpimen betpe-bet keldik» degen málimdemesine basa nazar aýdaryldy.
Atap aıtqanda, Prezıdent Qasym-Jomart Toqaev BUU Bas Assambleıasynda sóılegen sózinde Qazaqstannyń «ıadrolyq derjavalar arasynda kúsheıip kele jatqan báseke men teketireske alańdaıtyndyǵyn» aıtty.
Maqalada QR Prezıdentiniń «Buǵan deıin Qazaqstan ıadrolyq qarý synaqtarynan kóp zardap shekti. Sondyqtan, ıadrolyq derjavalar arasyndaǵy teketirestiń kúsheıý qaýpin jaqsy túsinemiz. Osyǵan oraı, ıadrolyq qarýsyzdaný Qazaqstannyń syrtqy saıasatynyń mańyzdy qyryna aınaldy. Biz ıadrolyq qarýdan azat álem qurý jolyndaǵy kúresimizdi jalǵastyra beremiz» degen sózi keltirilgen.
Sonymen qatar, QR Prezıdentiniń «biz ıAdrolyq qarýdy taratpaý týraly sharttyń jalpy konferentsııasy aıasynda ilgerileý joq ekenine alańdaımyz» dep atap ótkeni kórsetilgen.
Qazaqstan Kóshbasshysy: «Álem geosaıası qaıshylyqtar kúsheıip kele jatqan jańa kezeńge qadam basqan sekildi. Tártip pen jaýapkershilikke negizdelgen ári buryn qalyptasqan halyqaralyq júıeniń ornyn haos pen boljaýǵa kelmeıtin jaǵdaı basyp otyr. Tejemelik jáne tepe-teńdiktiń jahandyq júıesi beıbitshilik pen turaqtylyqty saqtap qala almady. Qaýipsizdik arhıtektýrasy kelmeske ketip barady. Álemdik alpaýyttar arasyndaǵy ózara senimsizdik jyldam arta tústi. Álem jańa áskerı qaqtyǵys oshaqtarynyń qurbanyna aınaldy. Biz eki býynnan keıin alǵash ret ıadrolyq qarýdyń qoldanylý qaýpimen betpe-bet keldik», - dep eskertken.
BIG ASIA men Interfax basylymdary Qazaqstan Prezıdenti Qasym-Jomart Toqaevtyń Eýropalyq komıssııanyń basshysy Ýrsýla fon der Lıaıenmen seısenbi kúni BUU Bas Assambleıasynyń 77-shi sessııasy aıasynda júrgizilgen kelissózderine jáne ony Qazaqstan Respýblıkasyna resmı saparmen kelýge shaqyrýyna nazar aýdardy.
Taraptar Qazaqstan men Eýropalyq Odaq arasyndaǵy keńeıtilgen strategııalyq áriptestikti damytý perspektıvalaryn talqylady. Qazaqstan Prezıdentiniń 2021 jylǵy qarashadaǵy Brıýsselge resmı saparynyń qorytyndylary boıynsha qol jetkizilgen ýaǵdalastyqtardy iske asyrýǵa den qoıdy. Atap aıtqanda, energetıka jáne kólik-logıstıka salalarynda birlesken jobalardy iske asyrý máseleleri qozǵaldy. Qasym-Jomart Toqaev pen Ýrsýla fon der Lıaıen strategııalyq áriptestikti odan ári jan-jaqty nyǵaıtýǵa ózara beıildiligin rastady.
Óz kezeginde, Eýropalyq komıssııanyń basshysy Qazaqstan Prezıdentiniń basshylyǵymen elde júrgizilip jatqan aýqymdy reformalardy joǵary baǵalady.
Saıası baǵdarlamaǵa Qasym-Jomart Toqaevtyń Azyq-túlik qaýipsizdigi men turaqty damý jónindegi jahandyq sammıtke qatysýy kiredi. Osy is-sharalardan basqa, AQSh-tyń sapar kestesi BUU Bas hatshysymen, Eýropalyq Odaq basshylyǵymen jáne birqatar memleket basshylarynyń ótinishterimen kezdesýlerdi qamtıdy.
Foto: akorda.kz