Qazaqstan Prezıdentiniń AQSh-qa sapary sátti aıaqtaldy - Qasym-Jomart Toqaev
«Onynshy qańtarda Elbasy Qazaqstan halqyna Joldaýyn jarııalady. Bul - tarıhı mańyzdy qujat. Sebebi Memleket basshysy «Tórtinshi ónerkásiptik revolıýtsııa» qarsańyndaǵy elimizdi odan ary qaraı damytýdyń naqty is-qımyl baǵdarlamasyn usynyp, negizgi mindetterdi belgilep berdi», - dep toqtaldy Toqaev Senattyń jalpy otyrysynda.
Osy oraıda Senat tóraǵasy jaqynda depýtattar óńirlerde el halqymen kezdesýler ótkizgenin, bul turǵyda Elbasynyń Joldaýyn jan-jaqty talqylaýǵa atsalysqanyn atap ótti.
«Bıýro Joldaýdy iske asyrý jóninde Senattyń arnaıy josparyn bekitti. Onda Elbasy Joldaýynda qoıylǵan mindetterdi tııanaqty oryndaýǵa baılanysty birqatar mańyzdy is-sharalar anyqtaldy. Joldaýdaǵy negizgi mindetterdi zańnamalyq turǵydan qamtamasyz etý - bizdiń basty mindetimiz. Sondyqtan barshamyz osy baǵytta joǵary jaýapkershilikpen belsendi jumys júrgizemiz dep senemin», -dedi ol.
Budan bólek, Qasym-Jomart Toqaev jýyrda Elbasynyń Amerıka Qurama Shtattaryna resmı sapary sátti aıaqtalǵanyn tilge tıek etti.
«Memleket basshysynyń BUU Qaýipsizdik Keńesiniń otyrysyna tóraǵalyq etip, keńes atynan málimdeme jasady. Aq úıde AQSh Prezıdentimen kelissózder barysynda el ekonomıkasyn damytý men óńirdegi qaýipsizdikti nyǵaıtý turǵysynan asa mańyzdy naqty kelisimderge qol jetkizilgeni málim. Bul óz kezeginde Qazaqstannyń dúnıejúzilik deńgeıindegi joǵary bedelin odan ári nyǵaıta túskeni sózsiz. Aldaǵy ýaqytta senatorlar parlamenttik dıplomatııa áleýetin keńinen paıdalana otyryp, Elbasynyń halyqaralyq jáne óńirlik qaýipsizdikti qamtamasyz etý jolyndaǵy tyń bastamalaryn ilgeriletýge laıyqty úles qosatynyna senimdin», - dedi Senat tóraǵasy.