Qazaqstan Prezıdenti «Jezqazǵan-Beıneý» jáne «Arqalyq-Shubarkól» jańa temirjol tarmaqtaryn ashady

JEZQAZǴAN. QazAqparat - Búgin Qazaqstan Prezıdenti Nursultan Nazarbaevtyń qatysýymen «Jezqazǵan-Beıneý» jáne «Arqalyq-Shubarkól» temirjoldarynyń paıdalanýǵa berilýiniń ashylýy kútilýde, dep habarlady QazAqparat tilshisi.

Aýqymdy kólik jobasynyń qurylysy 2012 jylǵy maýsymda ashylǵan bolatyn. «Qazaqstan temir joly» Ulttyq kompanııasy» AQ baspasóz qyzmetinen habarlaǵandaı, úlken jumystar júrgizildi. Atap aıtqanda, 1200 shaqyrymnan astam jol tóselip, túıistirildi, qyzmetkerler men qyzmet kórsetetin adamdarǵa turǵyn úı nysandary salyndy, qajetti ınfraqurylym turǵyzyldy. Jańa temir joldardyń ornalasýy Qazaqstannyń batysynan shyǵysyna jáne soltústiginen ońtústigine júkter tasymaldaý qashyqtyǵyn qysqartady, elimizdiń kólik múmkindikterin keńeıtedi.

«Búgin paıdalanýǵa beriletin 1000 shaqyrymnan asatyn temirjoldar «Soltústik-Ońtústik» jáne «Shyǵys-Batys» baǵyttaryndaǵy júk tasqyny baǵyttaryn ońtaılandyrady. Temirjoldardyń jumysy Ortalyq jáne Batys Qazaqstannyń damýyna qýatty serpin berip, óńirlerdiń ónerkásiptik áleýetteri men óndiristeriniń damýyn jedeldete ıgerýge jaǵdaı týǵyzyp, ekonomıkalyq belsendiligin yntalandyrady. 3,5 myń jumys oryndary ashylady», - dep habarlady baspasóz qyzmeti. QTJ jańa joldardy iske qosý Qytaıdan Reseı baǵytyna jáne odan ári Eýropaǵa transqazaqstandyq kólik dálizderiniń kóliktik áleýetin eleýli arttyrady, dep sanaıdy.