Qazaqstan Prezıdenti jaıyndaǵy kitap ázerbaıjan tiline aýdaryldy

ASTANA. QazAqparat - Qazaqstan Prezıdenti Nursultan Nazarbaevtyń ómir jolynan syr shertetin kitap ázerbaıjan tiline aýdarylyp, 500 danamen jaryq kórdi. 

Bul jaıynda aýdarma avtory, ázerbaıjandyq jýrnalıst Aıda Eıvazova aıtty, dep habarlaıdy QazAqparat.

«Professor Mahmud Qasymbekovtyń bul kitabyn Internetten kórip qalǵan edim. Sodan kitapty 6 aı boıy aýdaryp, eńbektendim. Kitap 500 dana taralymmen jaryqqa shyqty. Ol satylmaıdy, bizdiń elshilikke jáne ókildikke beriletin bolady», - dedi ol.

Kitap Halyqaralyq túrki akademııasynyń qoldaýymen basyp shyǵarylǵan.

«2005 jyly Qazaqstanda Prezıdent saılaýyna baqylaýshy retinde qatystym. Sol kezde Nursultan Ábishulymen suhbattasyp, ázerbaıjan halqyna qanshalyqty jyly nıetpen qaraıtyndyǵyn kórdim. Ázerbaıjan halqy ony óte jaqsy kóredi», - dedi Eıvazova.

Onyń aıtýynsha, aǵymdaǵy jyldyń 2 sáýirinde Qazaqstan Prezıdenti Nursultan Nazarbaevtyń Bakýge sapary ázerbaıjan halqy úshin naǵyz merekege aınaldy.

«Ómirden ozǵan Geıdar Álıevpen óte jaqyn dos boldy. Sondyqtan bolar, Nazarbaev bizdiń prezıdentimiz Ilhan Álıevke ákesindeı qaraıdy. Bul tek qana saıası dostyq emes, bul eki úlken tulǵanyń shynaıy dostyǵy bolatyn. Sol sebepti Ilham Álıev te bul qarym-qatynastardy joǵary baǵalaıdy», - dedi ázerbaıjandyq jýrnalıst.