Qazaqstan Prezıdenti túrik kompanııalaryn Túrkistandy damytýǵa shaqyrdy
«Áleýeti zor salalardyń biri - týrızm. Bul rette ekijaqty yntymaqtastyqtyń perspektıvaly baǵyttary retinde ań aýlaý, balyq aýlaý, mádenıet, bilim berý, medıtsınalyq jáne basqa da týrızm túrlerin qarastyrýǵa bolady. Túrik kompanııalarynyń mol tájirıbesin eskere otyryp, olardy týrızm salasyn damytýǵa edáýir úles qosady dep senemin. Onyń ústine ózderińiz bilesizder, qazir Ózbekstan men Qazaqstan arasyndaǵy, barlyǵymyzdyń aramyzdaǵy jaǵdaı basqasha, durys bolyp kele jatyr. Qyrǵyzstanda Túrik keńesin ótkizdik, qarym-qatynasty jetildiremiz dep aıttyq. Osyǵan baılanysty biz kóp jumys isteýimiz kerek», - dedi Nursultan Nazarbaev.
Memleket basshysy elimiz Túrkistan qalasyn oblys ortalyǵy dep jarııalap, atalǵan ortalyqty jetildirý maqsatynda jumys bastap ketkenin aıtty.
«Jaqynda men barlyq máselesin qaradym. Oblystyń ortalyǵy sol jerge kóship bardy, endi qurylystaryn jasaý kerek. Túrkistan barlyǵymyzdyń ortaq rýhanı ortalyǵymyz. Bir jylda mıllıon týrıs keldi. Osyǵan Sizderdiń de kómekterińiz tıedi dep oılaımyz»,- dedi Elbasy.
Nursultan Nazarbaev Qazaqstan ekonomıkany jedel jańǵyrtýǵa, tehnologııalar men ınnovatsııalardy engizýge baǵyt alyp otyrǵandyǵyn da aıtty.
«Osyǵan baılanysty barlyq salalardy qamtıtyn «Tsıfrlyq Qazaqstan» arnaıy memlekettik baǵdarlamasy júzege asyrylýda. Innovatsııalyq klasterler jumys isteýde. Jaqynda Astanada ІT-startaptardyń halyqaralyq tehnoparki ashyldy. Ol dúnıejúziniń ІT-kásipkerlerin jáne ınvestorlaryn tartyp, tehnologııalyq kompanııalardy qalyptastyrýǵa yqpal etedi. Osynyń barlyǵyn tıimdi áriptestikke múmkindik beretin alań retinde qarastyramyz», - dedi Memleket basshysy.
Foto: sxodim.com