Qazaqstan Prezıdenti retinde qazaq-qyrǵyz baılanystaryn damytýǵa múddelimin - Qasym-Jomart Toqaev
«Búgingi baýyrlas Qyrǵyzstanǵa memlekettik saparymnyń mán-mańyzy erekshe. Munyń sebebi barshamyzǵa aıqyn. Ejelden bizdiń elderimizdi myzǵymas dostyq baılanystar, tamyry tereń ortaq tarıh, til jáne mádenıet biriktiredi. Ata-babalardan mıras bolyp qalǵan osy berik arqaýdyń negizinde eki el arasyndaǵy odaqtastyq pen strategııalyq yntamaqtastyq damyp kele jatyr. Sondyqtan osy qundylyqtardy eselep, qazaq-qyrǵyz qatynastaryn jańa satyǵa kóterý úshin kúsh-jigerimizdi biriktirip, jumys isteımiz dep senemin», - dedi QR Prezıdenti.
Memleket basshysy táýelsizdik jyldarynda eki el ózara qarym-qatynystardy tabysty quryp kele jatqanyn atap ótti. Osy qatynastar odaqtastyq ári strategııalyq seriktestik deńgeıine jetti. Bul iske Elbasy Nursultan Nazarbaev baǵa jetpes úles qosty.
«Sonymen qatar, Qyryǵyzstan Prezıdenti Sooronbaı Jeenbekovtiń de mańyzdy úlesin atap ótken jón. Ol Qyrǵyz Respýblıkasyn basqarǵaly beri bizdiń elder arasyndaǵy yntymaqtastyq tyń serpin aldy», - dep qadap aıtty Qasym-Jomart Toqaev.
«Qazaqstan Prezıdenti retinde jan-jaqty qazaq-qyrǵyz ózara is-qımylyn damytýǵa múddelemin. Búgin qol qoıylǵan Birlesken deklaratsııa osyǵan dálel bolyp otyr. Shaǵyn quramdaǵy kezdesý barysynda tyńǵylyqty kelissózder júrgizildi. Sonymen qatar, biz úkimet músheleriniń jáne óńirler basshylarynyń qatysýymen Joǵary memleketaralyq keńestiń kezekti otyrysyn jemisti ótkizdik. Qos delegatsııa tarapynan eń joǵary deńgeıdegi ókilder boldy. Saýda-ekonomıkalyq baılanystarǵa aıryqsha nazar aýdaryldy», - dep túıdi Qasym-Jomart Toqaev.