Qazaqstan Prezıdenti óz halqynyń súıispenshiligi men qurmeti úshin maqtana alady - Mıhaıl Gýsman
«Men Shyǵysta dúnıege kelgenmin ári meni ata-anam eń úlken qýanysh, eń zor qurmet, eń úlken baqyt aqyldy adamdarmen áńgimelesý dep tárbıelegen bolatyn. Bul turǵyda meniń jolym boldy. Óıtkeni, men Nursultan Ábishulymen birneshe márte áńgimelesý qurmetine, baqytyna ıe bolǵan edim», - dedi M.Gýsman.
Ol 15 jyldyń ishinde Elbasymen san márte suhbat jasaǵanyn, Almatyda, sáni men saltanaty kelisken jańa Astanada, tipti bir ret Vashıngtonda da suhbat alýdyń sáti túskenin atap ótti.
«Myna bir qyzyqty detaldi atap ótýge tıispin: Onymen mereıtoıy qarsańynda suhbattasqanymda, ýaqyt óz jyldamdyǵyn batyl ózgertip jibergendeı kórindi», - dedi M.Gýsman.
Onyń túsindirýinshe, bul Nursultan Ábishulynyń qýatty energetıkaǵa, jańa ıdeıalar men oılarǵa ıe bolýyna, óz josparlarynyń, oılarynyń nátıjesine, óziniń aldyna, eldiń aldyna, Qazaqstan halqy aldyna qoıǵan mindetterdi júzege asyrýǵa degen jastardaǵydaı ójet qyzyǵýshylyǵyna baılanysty.
«Al bul jaıt eshkimdi beı-jaı qaldyrmaıdy, tańdanysyn týdyrmaı qoımaıdy. Óıtkeni, tek Astananyń ózi ǵana Nursultan Ábishulynyń qandaı mindetterdi alǵa qoıyp, ony sheshýge qalaı qol jetkizetindiginiń jarqyn kórinisi bola alady. Ol tóltýmasy - Qazaqstannyń elordasy Astana jaıynda aıtqan kezde óziniń et jaqyn týysy jaıynda aıtyp otyrǵandaı sezim týdyrady. Qazaqstannyń elordasy - Astana álemdik qarjy ortalyǵyna aınalady. Al eger Qazaqstan jaıynda aıtar bolsaq, onda ol álemdegi eń ozyq elderdiń biri, kópshilik úlgi alatyn memleket. Halyqaralyq iri sharalardy ótkizetin, onyń birazyn osy ýaqytqa deıin ótkizip úlgergen, alda «EKSPO-2017» halyqaralyq kórmesin ótkizetin el. Búginde Qazaqstan bul halyqaralyq sharaǵa tyńǵylyqty daıyndyq jumystaryn júrgizýde», - dedi ol.
«Munyń barlyǵynda da Nursultan Ábishulynyń eren eńbegi bar», - dep qosty M.Gýsman.
M.Gýsman QR Prezıdentiniń álemdik ıntegratsııalyq úderisterdegi baǵa jetpes rólin, olardyń álemdik qoǵamdastyqta zor baǵaǵa ıe bolyp otyrǵandyǵyn atap ótip, Elbasynyń aýqymdy strategııalyq oılaı bilý syndy kóregendilik qasıetin baǵalaýǵa múmkindik beretinin de basa aıtty.
«Osydan kóptegen jyl buryn aıtylǵan Eýrazııalyq odaq ıdeıasy - bul Nursultan Ábishuly Nazarbaevtyń ıdeıasy. Muny Reseı Prezıdenti Vladımır Vladımırovıch Pýtın de basa atap ótken bolatyn. Al bul ıdeıany bastapqyda kópshiligi birshama túsinbeýshilikpen qabyldaǵan edi. Eýrazııalyq odaqtyń qalaı jumys isteıtindigi, tipti onyń qalaı júzege asyrylatyndyǵy jaıynda túsinik te bolmaǵan-dy. Biraq, ıdeıa óte jandy ári ómirge qabiletti bolyp shyqty. Oǵan bizdiń, Reseıdiń de, Qazaqstannyń da jáne Belarýstyń da halqy qajetsinetindigi anyqtaldy. Bul turǵyda Nursultan Ábishuly syndy aýqymdy strategııalyq oılaý qabiletine ıe adamnyń tań qalarlyq kóregendigin atap ótken oryndy», - dedi M.Gýsman.
«Onyń mereıtoıyna baılanysty fılm jasaý múmkinshiligim bolǵany úshin maqtanamyn. Onyń ár sózin muqııat tyńdadym. Óıtkeni, ol kókjıekke kóz jiberip, aldaǵy kúndi dál boljaıtyn kóregendigin birneshe márte dáleldegen bolatyn. Sondyqtan da onyń bolashaq jaıynda aıtqandary qııal-ǵajaıyp ne bolmasa arman emes. Bul ol sózsiz qol jetkizetin jaıt», - dedi saıasattanýshy.
Onyń atap ótýinshe, QR Prezıdenti bizdiń elderimizdiń árqaısysynyń erekshelikterin, mádenı, ekonomıkalyq, saıası dástúrlerin eskere otyryp úlken ıntegratsııanyń, mol ózara is-qımyldyń qajettigi týraly aıtqan kezde - bul sózderdiń ar jaǵynda Elbasynyń shynaıy isteri men shynaıy sheshimderi jatyr desek artyq aıtqandyq emes.
«Onyń ón-boıynda áli de jasampaz energııa býyrqanyp jatyr», - dep atap ótti ol.
M.Gýsman óz sózinde áli kúnge deıin eshimge aıtpaǵan Elbasymen kezdesýindegi qyzyqty sátterdiń birin aıtyp berdi.
«Astanada bolǵan kezimizde Nursultan Ábishulymen suhbat jaıynda ýaǵdalastyq. Bizder suhbat aıaqtalǵannan keıin qalany aralap, ol ózi elordany kórsetetin bolyp keliskenbiz. Biraq, biz onyń rezıdentsııasynan shyqqanymyzda astananyń qatty jeli qarsy alyp, kún bulttanyp ketti. Ókinishke oraı, bizdiń josparymyzdyń oryndalmaıtyndyǵy anyq edi. Men batyldyq tanytyp: «Nursultan Ábishuly, men sizge kelesi joly suhbat alýǵa kelgenimde siz ben biz qalany aralap kóreıik», - dedim. Ol: «jaqsy, kelistik», - dep jaýap berdi.
Mine, sonymen 1 maýsym kúni men suhbat alý úshin taǵy keldim. Osy joly da ekinshi márte batyldanyp: «Nursultan Ábishuly, sizdiń qaryzyńyz bar», - dedim. Ol: «Qandaı?», - dep surady. Men: «Siz menimen birge Astanany aralaýǵa ýáde bergensiz», - dedim. Ol: «Sózińde turý kerek», - dedi. Biz osylaıshe elordany araladyq.
M.Gýsman bizdiń elordamyzdyń sulýlyǵyn atap ótip, Astanada kórgen jarqyn kórinisterge baılanysty óziniń oılarymen de bólisti. Ol elordany Elbasymen aralaý barysynda halyqtyń óz Prezıdentin qalaı qarsy alǵandyǵyn da aıtyp berdi.
«Astananyń sımvoly - «Báıterek» monýmentine keldik. Ol jerde qydyryp júrgen qalalyqtar, týrıster, nemeresin ertken ájeler, jas jubaılar boldy. Nursultan Ábishulyn halyqtyń qarsy alýy kóńil bosatarlyq kórinis boldy», - dedi ol.
Saıasattanýshy Prezıdenttiń júzdegen adamnyń qolyn qysyp, jastardyń, qarttardyń qasyna baryp áńgimeleskenin erekshe tolqynyspen atap ótti. «Men onyń jasampazdyqtyń taýsylmas energııasyn qaıdan alatyndyǵyn túsindim», - dedi ol.
«Bılik basynda birneshe jyl ótkizgen Nursultan Ábishuly áli kúnge deıin tań qalarlyq, esten tandyrarlyq bedelge ıe. Onyń dáleli - sońǵy prezıdenttik saılaý nátıjesi. Biraq, Saılaý komıssııasy kórsetetin tsıfr bir bólek, Memleket basshysyna halyqtyń shynaıy qarym-qatynasyn kórý bir bólek. Olar óz Prezıdentterin shynaıy súıispenshilikpen, shynaıylyqpen qarsy alady», - dedi M.Gýsman.
«Bul árbir kóshbasshysy maqtanýy tıisti jaıt. Al Nursultan Ábishulynyń shyn máninde maqtanýǵa tolyq quqyǵy bar», - dep túıindedi oıyn ol.