Qazaqstan Prezıdenti Konstantın Ernstti ordenmen marapattady

ASTANA. QazAqparat - Qazaqstan Prezıdenti dostyq pen yntymaqtastyqty nyǵaıtýǵa, sondaı-aq Qazaqstan men Reseı arasyndaǵy mádenı baılanystardy damytýǵa qosqan eleýli úlesi úshin «Pervyı kanal» aktsıonerlik qoǵamynyń bas dırektory Konstantın Ernstti ІІ dárejeli «Dostyq» ordenimen marapattady, dep habarlaıdy Aqordanyń baspasóz qyzmeti.

Marapattaý Astana klýbynyń úshinshi otyrysynyń sońynda boldy.

Buǵan deıin habarlanǵandaı, Elbasy Astana klýby Eýrazııa qurlyǵynyń bolashaǵy úshin ózekti máselelerdi keń aýqymdy saraptamalyq deńgeıde talqyǵa salatyn biregeı óńirlik basqosý alańy ekenin atap ótti. Nursultan Nazarbaev Astana klýbynyń jumysy aıasynda qazirgi zamannyń túıtkildi máselelerin sheshýdiń tıimdi joldaryn tabýǵa bolatynyn aıtty.

- Biz álemge sońǵy ýaqytta jetispeı jatqan nárseni bergimiz keledi. Bul degenimiz - jahandyq mindetterdi sheshý úshin birigý, aýyzbirshilik pen toleranttylyq tanytý, - dedi Qazaqstan Prezıdenti.

Memleket basshysy halyqaralyq terrorızm men ekstremızmniń kúsheıýine ákep soqtyratyn álemdegi geosaıası jáne ıdeologııalyq kúıreýdiń beleń alyp kele jatqanyn aıtty.

- Jahandyq damýdyń jańa betalysy Shyǵys - Batys baǵyty boıynsha geosaıası, geoekonomıkalyq jáne geoıdeologııalyq kúıreýdiń beleń alýy jaǵdaıynda júrip jatyr. Saıası qýǵyn-súrgin, joqshylyq, bilim berý men densaýlyq saqtaý deńgeıiniń tómendigi halyqaralyq terrorızm men ekstremızmniń kúsheıýine sebepshi bolyp otyr, - dedi Elbasy.

Sonymen qatar, Nursultan Nazarbaev óńirlik jáne halyqaralyq qaýipsizdiktiń qazirgi júıesinde birqatar máselelerdiń bar ekenin atap ótti. Bul máseleler álemniń ekonomıkalyq jáne tehnologııalyq keńistigin bóle-jaryp, qaýip tóndiretin sanktsııalyq teketirespen baılanysty bolyp otyr.

Qazaqstan Prezıdenti jahandyq shıelenistiń kúsheıýine áser etetin mılıtarıstik pıǵyldyń taralýyn, qarýlaný úderisiniń artyp kele jatqanyn, sondaı-aq ıadrolyq qarýdy qoldaný qaýpiniń qaıta paıda bolǵanyn aıtty. Bul rette, halyqaralyq terrorızm men ekstremızm apattyq aýqymǵa ıe bolǵanyn atap ótti.

Budan bólek, Memleket basshysy sońǵy 25 jylda álemdegi halyqaralyq mıgranttardyń sany eki ese ósip, búginde 250 mıllıon adamnan asqanyn atap ótip, baqylaýǵa kelmeıtin jahandyq kóshi-qon máselesine nazar aýdardy. Jahandyq deńgeıde halyq sanynyń ósýi azyq-túlik resýrstary tapshylyǵyn ózekti máseleler qataryna qosýda.

Qazaqstan Prezıdenti atalǵan máselelerdi sheshý úshin Eýrazııa qurlyǵy qaýipsizdik, ekonomıkalyq ósim men dıalog salasynda biriktirýshi kún tártibin usyna alatynyn aıtty.

Nursultan Nazarbaev «Bir beldeý, bir jol», Eýrazııalyq ekonomıkalyq odaq, Shanhaı yntymaqtastyq uıymynyń ekonomıkalyq ólshemi bastamalaryn, «Nurly jol» baǵdarlamasyn jáne basqa da jobalardy iske asyrý Eýrazııa qurlyǵynyń jańa geoekonomıkalyq keskindemesin jasaýǵa múmkindik beretinin atap ótti.

Sońynda Memleket basshysy jıynda bolǵan pikirtalas ornyqty jahandyq damý maqsatynda ári qaraı naqty sheshimder qabyldaý úshin septigin tıgizetinine senim bildirdi.