Qazaqstan Prezıdenti Kanadanyń general-gýbernatory Jýlı Paıetpen kezdesti
Nursultan Nazarbaev Jýlı Paıetpen júzdesý barysynda general-gýbernatordyń Qazaqstanǵa alǵashqy resmı saparynyń kanadalyq ǵaryshker Davıd Sen-Jaktyń Baıqońyr aılaǵynan ǵaryshqa attanǵan kezimen tuspa-tus kelýiniń sımvoldyq mánin atap ótti.
«Ózińiz de osyndaı mıssııamen ǵaryshta eki ret bolǵandyqtan, Siz úshin munyń mańyzy zor», - dedi Memleket basshysy.
Qazaqstan Prezıdenti bıyl eki el arasyndaǵy dıplomatııalyq qarym-qatynastardyń ornaǵanyna 26 jyl tolǵanyn aıtyp, saýda jáne ózara ınvestıtsııa salalarynda oń úrdis bar ekenine toqtaldy.
Kanadanyń general-gýbernatory J.Paıett Qazaqstanǵa resmı saparmen kelýge múmkindik berilgeni úshin rızashylyq bildirip, buǵan deıin túrli ǵarysh baǵdarlamalarynyń qatysýshysy retinde Baıqońyr ǵarysh aılaǵynda bolǵanyn aıtty.
«Men Qazaqstanǵa Premer-Mınıstrimizdiń sálemin ala keldim. Biz jerden sátti ushyp shyqqan ǵarysh ekıpajynyń qazir orbıtaǵa jetkenine qýanyshtymyz. Erteń ulttyq ǵarysh ortalyǵyna baramyz. Qazaqstannyń Ulttyq ǵarysh ortalyǵy men Kanadanyń Ǵarysh agenttigi arasyndaǵy ózara túsinistik týraly memorandým jemisti bolady dep úmittenemin», - dedi Jýlı Paıett.
Sonymen qatar, general-gýbernator Qazaqstan Prezıdentiniń antııadrolyq bastamalaryn Kanada tolyq qoldaıtynyn aıtty.
Sońynda taraptar bilim jáne ǵylym, aýyl sharýashylyǵy salalaryndaǵy jáne agroónerkásip sektoryndaǵy ózara yqpaldastyq máselelerin talqylap, búgingi sapar Qazaqstan men Kanada arasyndaǵy ózara tıimdi yntymaqtastyqty odan ári nyǵaıtýǵa septigin tıgizetinine senim bildirdi.