Qazaqstan Prezıdenti KADEX kórmesiniń basty ereksheligin atady
«Halyqaralyq «KADEX-2018» qarý-jaraq jáne áskerı-tehnıkalyq múlik kórmesiniń ashylýy qutty bolsyn! Besinshi ret ótkizilip otyrǵan aıtýly shara bıylǵy jyly Astananyń 20 jyldyǵymen týra kelip otyr. «Qazaqstandaǵy ǵarysh kúnderi» atty forýmnyń uıymdastyrylýy - bıylǵy kórmeniń basty ereksheligi bolyp tabylady. Munda álemdik ǵarysh salasynyń jetistikterine arnalǵan arnaıy pavılon ashyldy», - dedi Elbasy.
Qazaqstan Prezıdenti búginde KADEX qarý-jaraq jáne aqparattyq qaýipsizdik salasyndaǵy álemdik mańyzy sharaǵa aınalǵanyn, onda álemniń 28 elinen kelgen 318 kásiporyn óz ónimderin usynyp otyrǵanyn basa aıtty.
«Kórme qonaqtary qorǵanys-ónerkásip kesheniniń, ǵarysh salasynyń sońǵy jetistikterimen tanysatyn bolady. Bul rette elektrondy-júıeli baılanys, qarý-jaraqty basqarý isine basa mán berilgen. Aqparattyq qaýipsizdik salasyn jetildirýdiń tyń joldaryn zertteý máselesinde de nazar aýdaryldy. Kórme Qazaqstannyń qorǵanys ónerkásibiniń áleýetin arttyryp, ony jańa deńgeıge kóterýge septigin tıgizedi dep senemiz», - dedi Nursultan Nazarbaev.
Memleket basshysy osy sharaǵa qatysýshylar arasyndaǵy ózara tıimdi kelisimsharttar jasalýyna tilektes ekendigin de atap ótti.
«Kórmege qatysýshylar men uıymdastyrýshylar jumysyna zor tabys tileımin. El úshin paıdaly, áriptester úshin tıimdi sharanyń joǵary deńgeıde ótetindigine senemin. Qazaqstandyq tarap daıyndyq úshin qolynan kelgen sharanyń barlyǵyn jasady», - dep atap ótti QR Prezıdenti.
Aıta keteıik, elordanyń halyqaralyq áýejaıynyń áskerı sektory aýmaǵynda V halyqaralyq «KADEX-2018» qarý-jaraq jáne áskerı-tehnıkalyq múlik kórmesi óz jumysyn bastady.
Shara barysynda 17 otandyq kásiporyn 57 áskerı tehnıka men 162 áskerı-azamattyq maqsattaǵy buıymnyń tusaýkeserin ótkizbek.