Qazaqstan Prezıdenti Ábý-Dabıdegi sheıh Zaıd meshitinde boldy

ÁBÝ-DABI. QazAqparat - Resmı saparmen Birikken Arab Ámirlikterinde júrgen Qazaqstan Prezıdenti sheıh Zaıd meshitine bardy, dep habarlaıdy QazAqparat Memleket basshysynyń Twitter paraqshasyna silteme jasap.

«BAÁ tarıhı mańyzy zor nysandarynyń biri - Abý-Dabı qalasyndaǵy sheıh Zaıd meshitine baryp, Ámirlikterdiń negizin qalaýshy, Tuńǵysh Prezıdent sheıh Zaıd ben Sultan Ál Nahaıannyń rýhyna taǵzym ettim. Ekijaqty baılanysty nyǵaıtýǵa mol úles qosqan sheıh Zaıdqa qurmetimiz erekshe», - dep jazdy Qasym-Jomart Toqaev.

Aqorda baspasóz qyzmetiniń málimetinshe, Qasym-Jomart Toqaev sheıh Zaıd meshitindegi Qurmetti qonaqtar kitabyna «Óz halqynyń uly perzenti, Ámirlikterdiń negizin qalaýshy sheıh Zaıd ben Sultan Ál Nahaıannyń rýhyna taǵzym etemin. Baýyrlas Ámirlikter halqynyń yrysy mol, berekesi baıandy, mereıi laıym ústem bolýyna shyn júrekten tilektespin!» degen qoltańba qaldyrdy.

Eske sala keteıik, Qazaqstan Prezıdenti Birikken Arab Ámirlikterine sapary barysynda Nur-Sultan men Ábý-Dabı ashyq ári mazmundy dıalog ornata bilgenin aıtty.