Qasym-Jomart Toqaev Taıaý Shyǵystaǵy qazirgi ahýalǵa pikir bildirdi

<p>TMD-ǵa múshe Memleketter basshylary keńesiniń otyrysyna qatysyp jatqan&nbsp;Prezıdent Qasym-Jomat Toqaev Taıaý Shyǵystaǵy qazirgi ahýalǵa qatysty pikir bildirdi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;Aqordaǵa silteme jasap.</p>

«Qazaqstan halyqaralyq ózekti problemalardy sheshý úshin lańkestik ádisterdi qoldanýǵa múldem qarsy. Ondaǵan jyl boıy sheshimin tappaı kele jatqan mindetterdi júzege asyrý úshin beıbit azamattarǵa zorlyq-zombylyq kórsetip, terrorlyq aktsııalar jasaýǵa bolmaıdy. Bul – esh aqtaýǵa kelmeıtin áreket» – dedi Prezıdent.

Sonymen qatar Qasym-Jomart Toqaev Qazaqstannyń halyqaralyq qatynastarda ádildik qaǵıdatyn ornatýdy, halyqaralyq qoǵamdastyqtyń barlyq múshesiniń zańdy jáne egemendik quqyǵyn eskere otyryp, ony demokratııalandyrýdy jaqtaıtynyn jetkizdi.

Memleket basshysy BUU Qaýipsizdik Keńesindegi qazirgi toqyraý jaǵdaıynda ámbebap uıymnyń ókildik aıasy anaǵurlym keń organy sanalatyn BUU Bas Assambleıasynyń rólin kúsheıtýge múmkindik bar ári qajet dep esepteıdi.

«Bul rette BUU Qaýipsizdik Keńesin reformalaý isinde asyǵystyq tanytýǵa bolmaıdy. Bizdiń oıymyzsha, bul mańyzdy organǵa álemniń barlyq aımaǵynyń elderi, sonyń ishinde jahandyq Ońtústik memleketteri múshe bolýǵa tıis. Shyn máninde, bul ustanymdy osy jıynǵa qatysyp otyrǵan memleketter basshylarynyń barlyǵy quptaıtyny qýantady», – dedi Prezıdent.

Keńeste sondaı-aq, Qyrǵyzstan Prezıdenti Sadyr Japarov, Ázerbaıjan Prezıdenti Ilham Álıev, Belarýs Prezıdenti Aleksandr Lýkashenko, Reseı Prezıdenti Vladımır Pýtın, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov, Ózbekstan Prezıdenti Shavkat Mırzıeev, TMD Bas hatshysy Sergeı Lebedev sóz sóıledi.

Eske salaıyq, Qazaqstan Prezıdenti Qasym-Jomart Toqaev búgin Qyrǵyzstanǵa jumys saparymen bardy.

Memleket basshysyn «Ala-Archa» rezıdentsııasynda Qyrǵyzstan Prezıdenti Sadyr Japarov qarsy aldy.

TMD-ǵa múshe Memleketter basshylary keńesiniń otyrysynda Q.Toqaev, sondaı-aq tsıfrlyq sheshimderdi engizý sharalarynyń mańyzyna toqtaldy, TMD volonterleriniń jyl saıynǵy forýmyn ótkizýdi usynyp, TMD formatyndaǵy belsendi yqpaldastyqty jalǵastyrýǵa shaqyrdy.

Aıta keteıik, 2024 jyldyń 1 qańtarynan TMD organdaryna tóraǵalyq etý Reseı Federatsııasyna ótedi.