Qazaqstan poıyzdarynda ınternet qashan paıda bolady

<p>ASTANA. KAZINFORM &ndash; Elimizdiń poıyzdarynda ınternet qamtý maqsatynda pılottyq joba iske qosyldy.&nbsp;</p>

«Qazaqstan temir joly» ulttyq kompanııasy agenttiktiń resmı saýalyna spýtnıktik baılanys tehnologııalaryn testileý «Astana — Almaty» baǵytyndaǵy № ¾ poıyzda júrgizilip jatqanyn habarlady. Joba OneWeb spýtnıktik júıesi arqyly jelige qosylýǵa beıimdelgen vagondardyń qoldanystaǵy mýltımedııalyq jabdyqty paıdalanady.

— OneWeb — mobıldi spýtnıktik baılanysqa negizdelgen joǵary jyldamdyqty ınternet júıesi. Qazaqstandaǵy tehnologııanyń resmı dıstrıbıýtory Jusan Mobile AQ telekom-operatory, - dep túsindirdi QTJ. 

Testileý barysynda búkil marshrýt boıynsha ınternettiń turaqtylyǵy men ortasha jyldamdyǵy tekseriledi. Sonymen qatar jolserikterdiń mobıldi termınaldarynyń, qolma-qol aqshasyz tólemderge arnalǵan POS-termınaldardyń, poıyz bastyqtarynyń keýdege iletin vıdeotirkegishter men beınebaqylaý júıeleriniń jumysy baǵalanady. 

Poıyzdarda ınternetti qosýdyń naqty ýaqyty test nátıjelerine baılanysty bolmaq. 

— Pılottyq joba aıasynda ınternet jelisine qosylýdyń tehnıkalyq múmkindigi ǵana tekseriledi. Internetti qosýdyń merzimi men ekonomıkalyq quramdas bólikter boıynsha sheshim pılottyq jobanyń nátıjeleri boıynsha qabyldanady, - deıdi kompanııadan. 

Odan bólek, Qazaqstan temir joly kompanııasy otandyq jáne sheteldik basqa jetkizýshilerdiń usynystaryn qarastyrady. Qorytyndy sheshim qyzmettiń sapasyn, tıimdiligin jáne qunyn eskere otyryp qabyldanady. 

Eger joba sátti bolsa, ınternet barlyq poıyzda qosylýy múmkin. 

Aıta keteıik, byltyr Qazaqstan ınterneti eń arzan elder tizimine endi.