Qazaqstan Polshaǵa júk tasymalyn arttyrady - Elshi Marǵulan Baımuhan

ASTANA. QazAqparat - «Qazaqstan temir joly» basshylyǵy Polshaǵa qaraı júk tasymalyn arttyrý úshin kelissózder júrgizip jatyr. Bul týraly Astanada ótken baspasóz máslıhatynda Qazaqstannyń Polshadaǵy Tótenshe jáne Ókiletti Elshisi Marǵulan Baımuhan málim etti, dep habarlaıdy QazAqparat.

«Elshilik «Qazaqstan temir joly» kompanııasyna qajetti qoldaý sharalaryn jasap jatyr. Taıaý arada QTJ basshylyǵynyń Varshavaǵa sapary josparlanyp otyr. Osy oraıda kóliktik-tranzıttik yntymaqtastyq baǵyty boıynsha kelissózder júrgiziledi», - dedi M. Baımuhan.

Onyń sózine qaraǵanda, búginde Eýropa baǵytyna qaraı konteınerlik júk tasymaldary eleýli túrde artyp keledi. Ótken jyly Polsha aýmaǵy arqyly 201 myń konteıner ótkizilse, 2018 jyly 345 myń konteınerdi tasymaldaý josparda bar. Atap aıtqanda, 2020 jyly Polsha jerimen ótetin konteınerlerdi 800 myńǵa jetkizý eskerilip otyr.

«Bul turǵyda jalǵyz ǵana problema bar. Polshanyń temirjoldary ázirge osyndaı aýqymdy konteınerdi qabyldaýǵa daıyn emes. Olar búginde Eýropalyq odaqtan 15 mlrd eýroǵa tarta qarjy aldy. Osy oraıda ózderiniń ınfraqurylymyn jańǵyrtý jumystaryn júrgizip jatyr. Eger de Polsha men Belarýs elderiniń shekarasynda temirjol keptelisi paıda bolsa, onda sáıkesinshe Qazaqstan men Qytaı shekarasynda da júk poıyzdary turyp qalady. Sondyqtan biz temirjol kompanııalaryna barynsha járdemdesýge tyrysyp jatyrmyz», - dep túsindirdi Elshi.

Taratylǵan málimetterge qaraǵanda, Qytaı men Polsha arasyndaǵy araqashyqtyqty konteınerlik poıyzdar 11 kúnniń ishinde júrip ótedi. 2017 jyly olar 3 270 reıs jasasa, 2018 jyly bul kórsetkish 4 myńnan asady dep josparlanýda.