Qazaqstan Parlamentiniń depýtattary TMD PA keńesiniń otyrysyna qatysty
Jıyn Reseıdiń Sankt-Peterbýrg qalasynda ótti. Іs-shara barysynda qatysýshylar – TMD elderi ulttyq Parlamentteriniń basshylary – Assambleıanyń qyzmetine qatysty birqatar máseleni, onyń ishinde uıymnyń 2020 jylǵy jumysynyń qorytyndysyn talqylady.
Kún tártibinde TMD Parlamentaralyq Assambleıasynan kelgen halyqaralyq baıqaýshylardyń bıyl 10 qańtarda ótken Qazaqstan Respýblıkasy Parlamenti Májilisi depýtattarynyń saılaýyna júrgizgen monıtorıngtiń qorytyndysy boıynsha esebi de qaraldy. Otyrysta sóz sóılegen Máýlen Áshimbaev QR Parlamenti Májilisi depýtattarynyń kezekti saılaýyna halyqaralyq baıqaýshylar jibergeni úshin uıymǵa alǵys bildirdi.
«Ótken saılaý Qazaqstanda iske asyrylyp jatqan saıası reformalar aıasynda mańyzdy kezeńge aınaldy. Bul joly tek Parlament Májilisiniń depýtattary ǵana emes, sonymen birge jergilikti ókildi organdar – máslıhattardyń da depýtattary partııalyq tizimmen saılandy. Memleket basshysynyń bastamasymen alǵash ret partııalyq tizimde áıelder men jastarǵa arnalǵan 30 paıyzdyq kvota qarastyryldy. Májilis qyzmetinde salmaqty quqyqqa ıe bolǵan parlamenttik oppozıtsııa ınstıtýty zańmen bekitildi», – dedi Máýlen Áshimbaev.
Ol aldaǵy ýaqytta da Memleket basshysynyń jańǵyrý baǵdaryn iske asyrý aıasynda Qazaqstandaǵy saıası júıeni jetildirý jumystary jalǵasa beretinin tilge tıek etti.
«Jańa shaqyrylymdaǵy Parlamenttiń aldynda sóz sóılegen Qazaqstan Prezıdenti ótken saılaýdyń tájirıbesin eskere otyryp, saıası partııalardyń Májiliske ótý shegin 7-den 5 paıyzǵa tómendetýdi usyndy. Mundaı qadam eldegi saıası básekelestiktiń damýyna yqpal eteri sózsiz. Azamattardyń saılaý quqyǵyn qorǵaýǵa tıisti jaǵdaı jasaý úshin barlyq deńgeıdegi saılaý bıýlletenderine «bárine qarsymyn» degen jazý engiziletin boldy», – dedi Máýlen Áshimbaev.
Sonymen qatar otyrysqa qatysýshylar Assambleıa janyndaǵy Ekonomıka jónindegi saraptamalyq keńestiń jumysyn jáne Dostastyqtyń 2030 jylǵa deıingi ekonomıkalyq damý strategııasyn iske asyrý mindetterin talqylady.
TMD elderi Parlamentteriniń basshylary pandemııadan keıingi kezeńde elderimizdiń ekonomıkasyn qalpyna keltirýge osyndaı birlesken jumystar tyń serpin beretinine senim bildirdi.
Odan bólek, Máýlen Áshimbaev Sankt-Peterbýrgke jumys sapary barysynda birqatar ekijaqty kezdesýler ótkizdi.
Ózbekstan Olıı Majlıs Senatynyń Tóraıymy Tanzıla Narbaevamen kezdesýde eki jaq Qazaqstan-Ózbekstan qarym-qatynasyn odan ári damytý máselelerin sóz etti. Áriptester Qazaqstan Prezıdenti Qasym-Jomart Toqaevtyń 2019 jyldyń sáýir aıynda Ózbekstanǵa memlekettik sapary kezinde jasalǵan kelisimderdiń jáne Tanzıla Narbaevanyń 2019 jylǵy qarasha aıynda Qazaqstanǵa resmı sapary kezinde qol qoıylǵan Yntymaqtastyqtyń jol kartasyndaǵy tarmaqtardyń barlyǵy derlik iske asyrylǵanyn erekshe ekpinmen atap ótti. Sondaı-aq, Máýlen Áshimbaevtyń bıylǵy jazǵa josparlanǵan Ózbekstanǵa sapary da eki eldiń yntymaqtastyǵyn arttyrýǵa óz septigin tıgizetini aıtyldy.
«Bizdiń memleketterimizdiń arasyndaǵy tyǵyz, jan-jaqty jáne ózara senimge negizdelgen qarym-qatynas eki eldiń ulttyq múddelerine tolyq saı keledi. Qazirdiń ózinde ekijaqty baılanys aıasynda kóp sharýa atqaryldy. Eki eldiń Prezıdentteri memleketaralyq baılanystarymyzdyń erekshe qarqynmen damýyna bar jaǵdaıdy jasap keledi. Qazaqstan Parlamentiniń Senaty yntymaqtastyqty ári qaraı arttyrýǵa jáne bul baǵytta belsendi jumys júrgizýge daıyn», – dedi Máýlen Áshimbaev.
Reseı Federatsııasy Federaldyq Jınalysy Federatsııa Keńesiniń Tóraıymy Valentına Matvıenkomen kezdesýde qatysýshylar Qazaqstan men Reseı arasyndaǵy parlamentaralyq yntymaqtastyqtyń damý deńgeıine joǵary berdi jáne osy baılanysty ári qaraı nyǵaıtýǵa tolyq múmkindik bar ekenine nazar aýdardy.
«Qazaqstan men Reseıdiń memleketaralyq yntymaqtastyǵynda bizdiń parlamentaralyq baılanysymyzdyń mańyzy zor. Elderimizdiń ósip-órkendeýi kóp jaǵdaıda tatý kórshilik, syndarly jáne ózara tıimdi qarym-qatynasqa baılanysty», – dedi Qazaqstan Senatynyń Spıkeri.
Budan basqa taraptar Qazaqstan men Reseıdiń ekijaqty kún tártibindegi birqatar máselege kóńil bóldi.
Máýlen Áshimbaev pen Ázerbaıjan Respýblıkasy Mıllı Medjlisiniń Tóraıymy Sahıba Gafarova kezdesýinde elderimiz arasyndaǵy parlamentaralyq yntymaqtastyq pen ózara tıimdi qarym-qatynasty odan ári nyǵaıtý máseleleri keńinen sóz boldy. Qazaqstan delegatsııasynyń basshysy áriptesin Taýly Qarabaq qaqtyǵysynyń aıaqtalýymen quttyqtap, elimizdiń atalǵan óńirdiń ınfraqurylymyn qalpyna keltirýge qatysý nıetin taǵy bir ret rastady. Odan bólek, eki tarap pandemııadan keıingi kezeńde saýda-ekonomıkalyq yntymaqtastyqty jandandyrýǵa senim bildirdi.
Sondaı-aq, Máýlen Áshimbaev Armenııa Respýblıkasy Ulttyq jınalysynyń Tóraǵasy Ararat Mırzoıanmen ekijaqty kezdesý ótkizdi. Sonyń barysynda elderimiz arasyndaǵy saýda-ekonomıkalyq jáne mádenı-gýmanıtarlyq qarym-qatynastar pandemııaǵa qaramastan qarqyndy damyp kele jatqany aıtyldy.