Qazaqstan Parıj klımattyq kelisimine qosylý rásimin aıaqtap keledi - Q. Bozymbaev

ASTANA. QazAqparat - Qazaqstan Parıj klımattyq kelisimine qosylý rásimin aıaqtap keledi. Búgin Astanada Qazaqstan Premer-Mınıstri Kárim Másimovtiń tóraǵalyǵymen ótip jatqan QR Prezıdenti janyndaǵy «Jasyl ekonomıkaǵa» kóshý jónindegi keńestiń tórtinshi otyrysynda energetıka mınıstri Qanat Bozymbaev osylaı málim etti.

Mınıstrdiń aıtýynsha, Parıj klımattyq kelisimin iske asyrý Qazaqstan úshin mańyzdy mindetterdiń biri. «Parıj kelisimi bazasynda «jasyl ekonomıkaǵa» kóshý jol kartasyn ázirlep, tabıǵı resýrstardy tıimdi paıdalaný máseleleri júktelgen bolatyn. Energetıka mınıstrligi Parıj klımattyq kelisimine qosylýǵa baǵyttalǵan júıeli jumystar men «jasyl ekonomıkaǵa» kóshý tujyrymdasyn  júzege asyryp keledi. Byltyrǵy jyldyń qyrkúıeginde ótken Keńes otyrysynda parnıktik gazdardy 90-jyldardyń deńgeıine qaraǵanda 2030 jylǵa qaraı sózsiz maqsat retinde 15 paıyz, shartty maqsat retinde 25 paıyzǵa erikti túrde tómendetý týraly sheshim qabyldandy», - dedi Q. Bozymbaev.

Onyń aıtýynsha, búgingi kúni Elbasynyń Parıj kelisimine qosylý týraly Jarlyǵynyń jobasy ázirlendi.

Mınıstrdiń málimetinshe, Qazaqstanda 1990-2014 jyldar aralyǵynda shyǵaryndylardy 3,18 mlrd. tonnaǵa azaıtty. Sonymen bir mizgeldi absolıýttik shyǵaryndylar kólemi energoqamtymdylyqtyń tómendeýine qaramastan 2001-2015 jyldar aralyǵynda 2,1 esege artqan. «Shyǵaryndylardyń úlken kólemi Qazaqstada energetıka salasyna ǵana tıesili emes, ónerkásip pen aýyl sharýashylyǵyna da bunyń qatysy bar», dedi Q. Bozymbaev. 

Eske salaıyq, 2016 jylǵy 29 maýsymdaǵy jaǵdaı boıynsha Parıj kelisimine álemniń  178 memleketi qol qoıǵan, onyń ishinde 19 el BUU depozıtarııinde ratıfıkatsııalaý qujattaryn usynǵan.