Qazaqstan Parıj kelisimi aıasynda tómen kómirsýtekti damýdyń ulttyq strategııasyn qabyldaýy tıis - Q. Bozymbaev
Mınıstrdiń keltirgen málimetine qaraǵanda, búgingi kúni respýblıkamyzdyń elektr energetıkasyn óndirý salasynda jańartylatyn energııa kózderiniń úlesi 1 paıyzǵa da jetpeıdi. «Jańartylatyn jáne balamaly energııa kózderin damytý baǵdarlamasyna sáıkes, olardyń úlesi 2020 jylǵa qaraı 3 paıyzǵa, 2030 jyldarǵa deıin 30 paıyzǵa, 2050 jyldarǵa 50 paıyzǵa jetkizý kózdeledi», - dedi mınıstr.
Onyń aıtýynsha, shyǵaryndylardy azaıtý baǵytynda orman men aýyl sharýashylyǵy sektorynyń áleýeti joǵary. «Jalpy Qazaqstan óziniń aldyna qoıyp otyrǵan strategııalyq mindetterdiń barlyǵyna qol jetkizý áleýeti zor. Al Parıj klımattyq kelisimin ratıfıkatsııalaý elimizde tómen deńgeıli kómirsýtekti damý baǵytynda birqatar keshendi sharalar qabyldaýdy qajet etedi. Bul rette ulttyq ekonomıkanyń energııa tıimdiligin arttyrý sektorlarynda, óńdeý salasynda, aýyl sharýashylyǵynda, qurylys jáne kólik salalarynda aýqymdy jumystar atqarylýy tıis. Sol úshin Parıj klımattyq kelisimi aıasynda Qazaqstan shyǵaryndylardy, parnıktik gazdardy tómendetý boıynsha ulttyq mindettemelerge qol jetkizý úshin tómen kómirsýtekti damýdyń ulttyq strategııasyn qabyldaýy kerek. Bul arqyly Qazaqstan álemdik damýdyń trendinde bolyp, halyqaralyq ınvestıtsııalyq jobalarǵa qatysý múmkindigine arttyrady», - dedi Energetıka mınıstri.
Eske sala keteıik, «Jasyl ekonomıkaǵa» kóshý jónindegi keńes Parıj klımattyq kelisimin iske asyrý máselesine arnalyp otyr. 2016 jylǵy 29 maýsymdaǵy jaǵdaı boıynsha Parıj kelisimine álemniń 178 memleketi qol qoıǵan. Qazaqstan Parıj kelisimine qol qoıý rásimderin aıaqtap qaldy.