Qazaqstan paradzıýdo quramasy Azııa chempıonatynan 14 medal jeńip aldy

ASTANA. QazAqparat - Astanada paradzıýdodan Azııa chempıonatynyń jekeleı saıystary óz máresine jetti. 11 eldiń 100-den astam sportshysy J1 (kózi múldem kórmeıtin) jáne J2 (kózi nashar kóretin sportshylar) sanaty boıynsha ózara myqtyny anyqtady. Jekeleı saıys nátıjesinde Qazaqstan quramasy jalpy komandalyq medal kestesinde ekinshi orynǵa jaıǵasty, dep habarlaıdy QazAqparat.

Azııa chempıonatynyń jekeleı jarystary boıynsha medal kestesindegi úzdik úshtik:

Ózbekstan – 4 altyn, 6 kúmis, 3 qola

Qazaqstan – 4 altyn, 4 kúmis, 6 qola

Iran - 3 altyn, 2 qola

Qazaqstandyq paradzıýdoshylar tórt altyn, tórt kúmis jáne alty qola júldeni jeńip aldy.

Atap aıtqanda, Daıana Fedosova (-57kg, J2), Erǵalı Shameı (-73kg, J1), Alfııa Tilekqabyl (-57kg, J1) jáne Janbota Amanjol (-90 kg, J2) chempıon atansa, Aqmaral Naýatbek (-52 kg, J2), Erlan Konkıev (+90 kg, J2), Baýyrjan Arystanbekov (-90 kg, J1) jáne Ǵalymjan Smaǵululy (-90 kg, J2) kúmis, Oljas Orazaly (-73 kg, J2), Dınara Kýdjýlova (-70 kg, J1), Záýre Aıtek (+70 kg, J1), Talǵat Ajǵalıev (+90 kg, J2), Erlan Ótepov (+90 kg, J1), Dılorom Dıhanova (-57 kg, J1) qola medal enshiledi.

«Qazaqstan quramasy Azııa chempıonatyn josparlaǵanymyzdaı sátti aıaqtady. Dese de biz úshin Azııa chempıonaty aıaqtaldy dep aıtýǵa áli erte. Erteń komandalyq jarysta baq synaımyz. Jekeleı saıys boıynsha qurama jospardy tolyq oryndady. Azııa chempıonatynda jeńimpaz jáne júldegerler atanǵan sportshylardyń basym bóligi quramaǵa bıyl qosylǵan jas balýandar. Osyndaı álemdik dárejedegi alǵashqy jarystaryna qatysty. Olardyń keıbireýleri, mysaly Alfııa saýsaǵynyń synǵanyna qaramastan kúresip, jankeshtilik tanytty. 16 jasynda Azııa chempıony atandy. Para dzıýdoda osal sportshy degen bolmaıdy. Munda tatamıge shyqqan árbir balýan erekshe qurmetke ıe jáne olardyń erik-jigeri bárimizge úlgi dep oılaımyn», - deıdi Qazaqstan quramasynyń bas bapkeri Jandos Qııanov.

Erteń, 30 sáýir Astanadaǵy Jaqsylyq Úshkempirov atyndaǵy jekpe-jek saraıynda Azııa chempıonatynyń komandalyq jarysy ótedi.

Komandalyq jarysqa erler arasynda alty, al áıelder arasynda úsh qurama qatysady.