Qazaqstan pandemııa kezinde qoldaý sharalaryna 15 mlrd dollardan astam qarjy bólgen
«Qazaqstan Halyqaralyq eńbek uıymynyń (budan ári – HEU) ǵasyr deklaratsııasynyń eńbek salasynyń bolashaǵy týraly beıildiligin rastaıdy jáne Bas dırektordyń «Covid kezindegi eńbek» atty baıandamasyn quptaıdy. Ol jumys oryndaryn, halyqtyń tabysyn saqtaý jáne ekonomıkalyq ósýdi jandandyrý úshin tıisti jahandyq den qoıý sharalaryn qabyldaý maqsatynda ýaqtyly, ózekti ári qajet bolyp tabylady.
Pandemııa kezeńinde Qazaqstan Úkimeti jumyspen qamtýǵa járdemdesýge, kásipkerlikti jandandyrýǵa, tsıfrlandyrýǵa jáne agroónerkásiptik keshendi damytýǵa baǵyttalǵan daǵdarysqa qarsy sharalardy qabyldady.
2020 jyly atalǵan sharalarǵa 15 mlrd AQSh dollarynan astam qarajat bólindi.
Pandemııa kezeńinde 1 mlrd AQSh dollarynan astam somaǵa 4 mln 600 myń azamat tabysynan aıyrylý boıynsha áleýmettik tólemder aldy, sondaı-aq birjolǵy áleýmettik tólemder aýrý juqtyrǵan medıtsına qyzmetkerlerine jáne qaıtys bolǵan medıtsına qyzmetkerleriniń otbasylaryna jalpy somasy 50 mln AQSh dollaryna júrgizildi.
Halyqtyń áleýmettik osal toptarynan 1 mln-nan astam azamat 60 mln AQSh dollary somasyna azyq-túlik-turmystyq jıyntyqtar aldy.
Elektrondyq úkimet portaly arqyly ataýly áleýmettik kómekke ótinish berý tetigi iske asyryldy.
936 myń adamǵa ataýly áleýmettik kómek kórsetildi, 218 myń balaǵa jalpy somasy 214 mln AQSh dollaryna kepildik berilgen áleýmettik toptama usynyldy.
Ótken jyly «Jumyspen qamtýdyń jol kartasy» daǵdarysqa qarsy baǵdarlamasy iske qosyldy, onyń aıasynda 239 myń jumys orny quryldy. Ony júzege asyrýǵa 2 mlrd 400 mln AQSh dollary bólindi.
Qabyldanǵan sharalardyń nátıjesinde jumyssyzdyq deńgeıi 4,9% qurady, onyń ishinde áıelder arasynda – 5,3%, jastar arasynda – 3,8%.
Jumyspen qamtý sharalarymen bıyl 1 mln 200 myń adam qamtylatyn bolady.
Aǵymdaǵy jyldan bastap Jumyspen qamtýdyń memlekettik baǵdarlamasyn ulttyq jobaǵa qaıta formattaý josparlanýda, oǵan bes baǵyt – kásibı jáne aýmaqtyq utqyrlyq, ónimdi jumys oryndary, aýyldaǵy bıznes jáne jumyspen qamtýdy tsıfrlandyrý kiredi.
Qazaqstanda Múgedektigi bar adamdardyń quqyqtaryn, onyń ishinde laıyqty eńbek etý quqyǵyn qamtamasyz etý jónindegi 2025 jylǵa deıingi ulttyq jospar iske asyrylýda.
Ótken jyly «Múgedektigi bar adamdarǵa usynylatyn kásipter men sabaqtardyń atlasy» ázirlendi jáne múgedektigi bar adamdarǵa ońaltýdyń tehnıkalyq quraldary men qyzmetterin óz betinshe tańdaýǵa múmkindik beretin Áleýmettik qyzmetter portaly engizildi.
2020 jylǵy mamyrda Eńbek zańnamasyna qyzmetkerlerdiń eńbek quqyqtaryn qorǵaýdy qamtamasyz etý úshin kásipodaqtardyń rólin arttyrýǵa qatysty ózgerister engizildi.
Bıyl Úkimet, kásipodaqtar men jumys berýshilerdiń respýblıkalyq birlestikteri arasyndaǵy 2021-2023 jyldarǵa arnalǵan jańa Bas kelisimde taraptardyń bir-biriniń qyzmetine zańsyz aralasýǵa jol bermeý jónindegi mindetteme bekitilgen.
Áıelderdiń eńbegi shekteletin jumystar tizimin joıý jáne qashyqtyqtan jumys isteýdi quqyqtyq retteýdi jetildirý máseleleri pysyqtalýda.
Qazirgi ýaqytta «Tolyq emes jumys ýaqyty jaǵdaıyndaǵy jumys týraly» HEU № 175 Konventsııasyna qosylý boıynsha jumys júrgizilýde.
Sońynda Qazaqstan Úkimeti HEU standarttaryna sáıkes áleýmettik-eńbek saıasatyn jetildirý, áleýmettik ádilettilik pen laıyqty eńbekti qamtamasyz etý jónindegi jumysty jalǵastyratynyn atap ótkim keledi», – dedi Serik Shápkenov beıne habarlamada.
Esterińizge sala keteıik, Halyqaralyq eńbek konferentsııasy HEU-nyń sheshim qabyldaýdyń joǵary organy bolyp tabylady. Ol jyl saıyn HEU-ǵa múshe 187 memleketten úshjaqty delegatsııalardyń basyn qosý jolymen ótkiziledi.