Qazaqstan Palestınanyń 1967 jylǵy shekarasynyń qaıtarylýyn qoldaıdy – Murat Nurtileý
«Jańa ǵana qurmetti áriptesimmen shaǵyn jáne keńeıtilgen quramda dástúrli dostyq, ózara qoldaý men senim rýhyndaǵy kelissózder ótti. Biz yqpaldastyǵymyzdyń tyń baǵyttaryn aıqyndap, irgeli mindetterdi qarastyrdyq. Ortalyq Azııa memleketteriniń jan-jaqty jaqyndasýy ýaqyt talabynan týyndap otyr. Qazaqta «Tatýlyq – taýsylmas baqyt» degen dana sóz bar. Osy tusta, Ortalyq Azııa memleketteri basshylarynyń Konsýltatıvtik keńesteri aıasyndaǵy áriptestigimizdiń róli erekshe. Sáıkesinshe, biz bıylǵy tamyz aıynda Astanada ótetin Konsýltatıvtik keńestiń 6-shy sammıtine daıyndyq máselelerin ortaǵa saldyq. Naqty aıtqanda, «Ortalyq Azııa – 2040» Óńirlik kooperatsııa damý strategııasyna qol qoıýdy mańyzdy dep sanaımyz. Sonymen qatar Ortalyq Azııada HHІ ǵasyrda dostyq, tatý kórshilik jáne yntymaqtastyq týraly shartqa barlyq taraptar qol qoıady degen úmitimiz zor», - dedi Murat Nurtileý.
Onyń atap ótýinshe, qazaq-túrikmen seriktestigi kópjaqty qurylymdar aıasynda oıdaǵydaı damýda. Kóptegen jahandyq máselelerge qatysty eki eldiń ustanymdary uqsas.
«Áriptesim ekeýmiz basqa da óńirlik jáne halyqaralyq úrdister boıynsha pikir almasyp, dıalogymyzdy odan ári jalǵastyrýǵa kelistik. Atap aıtqanda, Halyqaralyq Araldy qutqarý qorynyń áleýetin barynsha paıdalaný mańyzdylyǵyna nazar aýdaryldy. Qazaqstan óziniń tóraǵalyǵy aıasynda barlyq taraptyń múddelerin eskerip, belsendi jumys júrgizýdi josparlap otyr. Bul rette, sý-energetıkalyq yntymaqtastyqtyń mehanızmin damytýdaǵy Túrikmenstannyń qoldaýyn jáne árekettesýge daıyndyǵyn joǵary baǵalaımyz. Sonymen birge, Taıaý Shyǵys óńirindegi kúrdeli protsesterge de jeke toqtalyp, oı-pikir bólistik. Palestına máselesi búgingi tańda ýshyǵyp jatqany belgili», - dedi ol.
Vıtse-premer jaqynda Norvegııa, Ispanııa jáne Irlandııa Palestınanyń memlekettigin moıyndaǵan atap ótti.
«Qazaqstan mundaı qadamdy tolyq quptaıdy. Biz Palestınany egemen memleket retinde 1992 jyly moıyndadyq. Osy mańyzdy halyqaralyq problemany Birikken Ulttar Uıymynyń tıisti rezolıýtsııalaryna sáıkes, saıası-dıplomatııalyq jolmen sheshý qajet degen ustanym biz úshin eshqashan ózektiligin joǵaltqan emes. Sol jyldan beri Astana men Ramalla dıplomatııalyq qarym-qatynas ornatyp, elshilerin taǵaıyndady. Qazaqstan osy ustanymnan tanbaı, Palestına táýelsizdigin, qaýipsizdigin jáne 1967 jylǵy shekarasynyń qaıtarylýyn qoldaıdy», - dedi Murat Nurtileý.