Qazaqstan Pákistanǵa jańa baǵdar arqyly birneshe júk kóligin jóneltti

ASTANA. QazAqparat – Qazaqstan pılottyq rejımde Aýǵanstan arqyly Pákistanǵa jańa saýda baǵdarymen birneshe júk kóligin jóneltti. Bul týraly Saýda jáne ıntegratsııa vıtse-mınıstri Qaırat Tórebaev aıtty, dep habarlaıdy QazAqparat tilshisi.

«Biz pákistandyq National Logistics Cell kompanııasymen kelissóz júrgizip jatyrmyz. Ol qaýipsiz rejımde Pákistan men Qazaqstan arasyndaǵy taýar aınalymyn qamtamasyz etedi. Taıaýda pılottyq jobany iske qostyq jáne bul baǵdarmen birneshe júk kóligi attandy. Bul rette júk Qazaqstannan Pákistanǵa jáne keri baǵytta 4 myń shaqyrym jolda bolady. Bul óńirlik damý turǵysynan alyp qaraǵanda aıtarlyqtaı úlken araqashyqtyq emes», - dedi vıtse-mınıstr elimizdiń Syrtqy ister mınıstrliginde ótken brıfıngte.

Sonymen qatar onyń atap ótýinshe, Qazaqstan Aýǵanstanǵa un men astyq jetkizý úshin Ózbekstanmen ózara is-qımyldy jalǵastyrady. Munan bólek, Túrikmenstan aýmaǵy arqyly Aýǵanstan baǵytynda júk tasymaldaýda 30 paıyzdyq keńildik jasaý týraly da atalǵan elmen ýaǵdalastyq bar.