Qazaqstan ózin negizgi azyq-túlikpen tolyq qamtýy kerek – Premer-Mınıstr
Onyń aıtýynsha, 2024-2028 jyldarǵa arnalǵan Jol kartasynda jalpy ónim kólemin 2 esege arttyrý kózdelgen. Bıyl bul jospar 111%-dy quraıdy.
«6 aıdyń qorytyndysy boıynsha ósim 103%-dy kórsetti. Degenmen, ósimdik sharýashylyǵynyń tıimdiligin kúzde kóremiz. Salany damytý úshin barlyq qajetti jaǵdaı jasaldy. Qazaqstan ózin negizgi azyq-túlik ónimderimen tolyq qamtamasyz ete otyryp, eksportty da damytý kerek. Úkimet osyǵan qajetti barlyq resýrstardy bóledi. Aýyl sharýashylyǵyn damytý – meniń jeke baqylaýymda turatyn basym baǵyt», - dedi O. Bektenov búgingi Úkimet otyrysynda.
Bıyl kóktemgi egis jumystary men aýyl sharýashylyǵy tehnıkalarynyń lızıngine aýqymdy qarajat baǵyttaldy. Jeńil sharttarmen nesıe berý kólemi birinshi ret 580 mlrd teńgege jetkizildi. Buǵan deıin bul kórsetkish 180 mlrd teńgeden asyp kórmegen.
«Bul eginshilerdiń barlyq qajetti agrotehnıkalyq is-sharalardy tolyq kólemde júrgizýine múmkindik berdi. Munda qarjylandyrý kózderi, onyń ishinde Áleýmettik-kásipkerlik korporatsııalardy tartý esebinen barynsha keńeıtildi. Qarjy ınstıtýttaryn tikeleı sýbsıdııalaý jáne agroónerkásip keshen sýbektileriniń qaryzdaryn kepildendirý tetikteri engizildi», - dedi Úkimet basshysy.
Premer Jol kartasynyń ındıkatorlaryna qol jetkizý boıynsha shara qabyldaýdy tapsyrdy. Mıneraldy tyńaıtqyshtardy qoldaný deńgeıin jyl saıyn 1,5 mln tonnaǵa deıin jetkizý qajet.
«Óńir ákimdikteri egin oraǵy bastalǵansha astyq qabyldaý kásiporyndarynyń jańa ónim qabyldaýǵa tolyq daıyndyǵyn qamtamasyz etsin. Egin jınaý kezeńinde astyq qabyldaý kásiporyndary úzdiksiz jumys isteýge tıis. Óńir ákimdikteri jeńildikti qarjylandyrýdyń, onyń ishinde Áleýmettik-kásipkerlik korporatsııalar beretin qarjylandyrýdyń dıqandarǵa 100% jetkizilýin qamtamasyz etsin», - deıdi O. Bektenov.