Qazaqstan óziniń ulttyq múddesin eskerip, tıisti saıasatyn júrgizip jatyr – Senat tóraǵasy
«Birinshiden, árbir el óziniń ulttyq múddesine baǵyttalǵan saıasatty júzege asyrýǵa mindetti. Bul turǵyda Qazaqstanda da óziniń ulttyq múddesin eskerip, tıisti saıasatyn júrgizip jatyr. Bizdiń ulttyq múddemizge aýmaqtyq tutastyǵymyz, táýelsizdigimiz, azamattardyń qaýipsizdigi, eldiń turaqtylyǵy, memlekettik ınstıtýttar jatady. Sondyqtan naqty bir memleketten «qaı elmen qarym-qatynasyńdy nyǵaıtasyń» dep suraý durys emes. Osy oraıda «dál qazir ulttyq múddelerińiz qandaı basymdyqtardy eskerip otyr» dep suraǵan jón bolar», - dedi M. Áshimbaev forýmda pikir almasý kezinde.
Osy oraıda ol Qazaqstan óziniń táýelsizdigin nyǵaıtýdy, ekonomıkany damytýdy basty maqsat retinde qoıǵanyn aıtty.
«Osy maqsat aıasynda alpaýyt memlekettermen yntymaqtastyqty jalǵastyramyz. Máselen, AQSh Qazaqstan ekonomıkasyndaǵy eń iri ınvestorlardyń biri sanalady. Amerıka kompanııalary Qazaqstannyń . energetıka salasyna kóp ınvestıtsııa saldy. Sondyqtan biz olarmen jumys istep, jańa jobalardy iske asyrǵymyz keledi. Bul rette Qytaıdyń, Eýropanyń kompanııalarmen birge jumys isteýge múddelimiz. Kórshiles Reseı de bizdiń basty seriktesterimizdiń biri. Atap aıtqanda, ulttyq múdde turǵysynda barlyq eldermen jaqsy qarym-qatynasta jalǵastyramyz», - dedi Senat tóraǵasy.
Onyń paıymynsha, ótken ǵasyrda qalyptasqan eski túsinikterden alshaqtaý kerek.
«Qazirgi kezde halyqaralyq júıe iri memleketterdiń múddesi tóńireginde damyp keledi. Meniń oıymsha, bul kózqaras 21 ǵasyrda durys emes. Bizge barlyq eldiń múddesi aıasynda teńgerimdi eskeretin, sondaı-aq barlyq elge birdeı qurmetpen qaraıtyn jańa paradıgma qajet. Bul óz kezeginde jańa basymdyqtardyń biri», - dedi Máýlen Áshimbaev.