Qazaqstan óziniń ǵaryshkerin 2017 jylǵa qaraı ushyrýdy kózdep otyr
20:07, 05 Mamyr 2014
ASTANA. QazAqparat - Búgin Ortalyq kommýnıkatsııalar qyzmetindegi brıfıngte QR Ulttyq ǵarysh agenttiginiń tóraǵasy Talǵat Musabaev Qazaqstan óziniń ǵaryshkerin 2017 jyly ushyratynyn jetkizdi.
Onyń sózine qaraǵanda, qazirgi kezde osy baǵytta agenttik tarapynan kúrdeli ári naqty jumystar atqarylýda. «Kelissózder júrgizilýde. Aldyn ala málimetter boıynsha 2017 jylǵa qaraı osyǵan qol jetkizýimiz múmkin dep aıta alamyn», - dedi T. Musabaev.
Belgili bolǵandaı, ǵaryshqa ushýǵa kandıdat retinde Aıdyn Aıymbetov tirkelip tur. Sonymen qatar agenttik basshysy ǵaryshqa ózge de adamdar daıyndyqtan ótetinin jetkizdi.
T. Musabaevtyń aıtýynsha, bizdiń ǵaryshkerdi ushyrý úshin búginde Halyqaralyq ǵarysh stansasy quramyndaǵy birqatar elderdiń ruqsaty kerek. Osy oraıda olardyń ózderiniń mamanynyń ornyna qazaqstandyq ǵaryshkerdi jiberýge ruqsat alý - kúrdeli másele.