Qazaqstan ózin Palestınanyń naǵyz dosy retinde tanytty - Rııad ál-Málkı

ASTANA. QazAqparat - Qazaqstanmen qatynastarda damytý arqyly Palestına tarapy óziniń paıdaly úlesin tıgize alady. Bul týraly Astanada QR Syrtqy ister mınıstri Qaırat Ábdirahmanovpen kezdesýden keıin Palestına Syrtqy ister mınıstri Rııad ál-Málkı málim etti, dep habarlaıdy QazAqparat.

Turaqty qoldaý úshin Qazaqstanǵa alǵysyn jetkizgen Rııad ál-Málkı, «Astanaǵa jasaǵan sapar eki eldiń ózara qarym- qatynasyn nyǵaıtýǵa, sondaı-aq Palestına halqynyń alǵysyn Qazaqstan Prezıdentine, QR Úkimetine jetkizýge jaqsy múmkindik boldy. Atap aıtqanda, elderińiz qıyn jyldarda óńirlik ári halyqaralyq deńgeıde Palestınaǵa qoldaý jasady», - dedi.

Osy oraıda ol Qazaqstan ózin Palestınanyń turaqty dosy retinde tanytqanyn atap ótti.

«Elderińiz bizdiń bastamalarǵa qoldaý bildirip keledi, sonymen qatar óńirde beıbitshilikti nyǵaıtý úshin barlyq kúsh-jigerin jumsaýda. Biz bul qadamdardy joǵary baǵalaımyz. Biz úshin búgingi kezdesý ekijaqty qatynastardy keńeıtý úshin jańa múmkindikterge jol ashady», - dedi sheteldik meıman.

Budan bólek, Rııad ál-Málkı túrli máselelerdi sheshýde Qazaqstan elordasy óńirlik ári halyqaralyq habqa aınalǵanyn jetkizdi.

«Bul rette búginde Astanada álemdigi ózekti máseleler talqylanyp keledi. Sondaı-aq bul qala qarjy ortalyǵyna aınalýda. Bizdiń oıymyzsha, kóp salalarda yntymaqtastyǵymyzdy damyta alamyz. Astanamen yntymaqtastyq aıasynda Palestına tarapy óziniń paıdaly úlesin tıgizýge qaýqarly», - dedi ol.

Budan buryn habarlanǵandaı, búgin Astanada QR Syrtqy ister mınıstri Qaırat Ábdirahmanov Qazaqstan dostas Palestınanyń barlyq beıbit umtylystaryna járdemdesetinin atap ótti. 

Munymen qosa, Palestına memleketiniń Syrtqy ister jáne ekspatrıanttar mınıstri Rııad ál-Málkıdiń Qazaqstan Respýblıkasyna sapary aıasynda eki qujatqa qol qoıyldy.