Qazaqstan Ózbekstanmen shekarany shegendeý protsesin tolyq aıaqtady
«Memlekettik shekarany halyqaralyq-quqyqtyq resimdeý elimizdiń ulttyq qaýipsizdigin nyǵaıtýǵa yqpal etetin Qazaqstannyń syrtqy saıasatynyń strategııalyq baǵyttarynyń biri bolyp sanalady. Ózbekstanmen arada shekarany zańdy resimdeý protsesi 2022 jylǵy 22 jeltoqsanda eki el prezıdentteriniń Qazaqstan-Ózbekstan memlekettik shekarasyn shegendeý týraly shartqa qol qoıýymen aıaqtaldy. Shekarany shegendeý 2001 jáne 2002 jylǵy Qazaqstan-Ózbekstan memlekettik shekarasy týraly sharttar negizinde júrgizildi», - dedi QR Syrtqy ister mınıstriniń orynbasary Roman Vasılenko.
Sonymen qatar ol shegendeý boıynsha kelissózder protsesi 2003 jyly bastalǵanyn aıtty. Shekaralyq belgilerdi jergilikti jerde ornatý boıynsha jumystar 2004 jyldan 2021 jylǵa deıin jalǵasty. 19 jyl ishinde Qazaqstan-Ózbekstan birlesken shegendeý komıssııasynyń 100 otyrysy jáne birlesken shegendeý jumys tobynyń otyz tórt kezdesýi ótti.
«Shegendeý jumystardyń nátıjeleri boıynsha shekaranyń uzyndyǵy 2 356 shaqyrymdy qurady. Shekara syzyǵynda 1301 belgi ornatyldy. «Qazaqstan Respýblıkasynyń halyqaralyq sharttary týraly» Zańyna sáıkes, Shart ratıfıkatsııalaýǵa jatady. Osyǵan baılanysty Senattyń qaraýyna tıisti zań jobasy engizilip otyr. Qazaqstannyń syrtqy saıası múddeleri turǵysynan Sharttyń kúshine enýi Qazaqstan-Ózbekstan memlekettik shekara syzyǵynyń jergilikti jerde belgilenýin zańdy bekitýge, eki el arasyndaǵy memlekettik shekarany halyqaralyq-quqyqtyq resimdeý protsesin aıaqtaýǵa, memlekettik shekara aýdanynda qaýipsizdik pen turaqtylyqty nyǵaıtýǵa, ekijaqty ári óńiraralyq jáne shekara mańyndaǵy ózara is-qımyldy nyǵaıtýǵa yqpal etedi», - dedi mınıstrdiń orynbasary.
Onyń sózine qaraǵanda, Qazaqstannyń Qytaımen shyǵystaǵy shekarasy 20 jyl buryn tıisti halyqaralyq sharttarmen mejelendi jáne shegendeldi. Budan basqa, Qyrǵyzstanmen jáne Túrikmenstanmen memlekettik shekarany mejeleý jáne shegendeý týraly sharttar da jasaldy. Sonymen birge, byltyr Túrikmenstanmen arada teńiz memlekettik shekarasyn mejeleý týraly shart kúshine endi. Osy oraıda Ózbekstanmen arada shekarany shegendeý týraly sharttyń kúshine enýi arqyly Qazaqstan Respýblıkasynyń memlekettik shekarasyn ońtústik baǵytta zańdy resimdeý protsesiniń tolyq aıaqtalǵanyn aıtýǵa bolady.
«Reseımen arada shekarany shegendeýge keletin bolsaq, bul baǵyttaǵy kelissózder josparly túrde júrgizilip jatyr. Bul protsess jergilikti jerde shekaralyq belgilerdi ornatý boıynsha tıisti jumystardy, sondaı-aq búkil shekara syzyǵyna shegendeýdiń qorytyndy qujattaryn daıyndaý jáne kelisý boıynsha jumystardy qamtıdy. Reseımen arada shekaranyń uzyndyǵyn (7548 km), onyń kúrdeli relefi bar ýchaskelerdiń bolýyn, sondaı-aq shegendeý qujattardy daıyndaý boıynsha jumystardyń aýqymdy kólemin eskere otyryp, ony shegendeýdi aıaqtaý úshin úsh-tórt jyl qajet bolady», - dedi R. Vasılenko.
Budan buryn habarlanǵandaı, Qazaqstan men Ózbekstan arasyndaǵy shekara syzyǵy 5 km uzarady.