Qazaqstan Ózbekstan armııasy úshin túnde kórý quraldaryn jetkizdi

ASTANA. QazAqparat -«KAE» qazaqstandyq kásiporny Ózbekstan Qarýly kúshteriniń qajettiligi úshin túnde kórýge arnalǵan quraldardyń tájirıbelik partııasyn jetkizdi, dep habarlaıdy QazAqparat «Qazaqstan ınjınırıng» Ulttyq kompanııasyna silteme jasap.

Atap ótilgendeı, qazaqstandyq ónimder Ózbekstan áskerine 2017 jyldyń sońynda jetkizilgen. Alaıda, sheteldik seriktester eksporttyq ónimniń jelisin arttyrýǵa qaıta qyzyǵýshylyq bildirgen.

«Zaýyt óziniń elektrondy-optıkalyq ónimin 2017 jyldyń qyrkúıek aıynda Tashkentte ótken «Ózbekstan-Qazaqstan» yqpaldastyqtyń jańa kezeńi» ónerkásiptik jármeńkesinde tanystyrǵan bolatyn. Keıin ózbekstandyq tarap qyzyǵýshylyq tanytyp, ekijaqty kelisim ázirlendi. Túnde kórýge arnalǵan qazaqstandyq quraldar tıisti synaqtardan sátti ótti. Atap ótý kerek, qazirgi ýaqytta ózbekstandyq seriktester eksporttyq ónimniń jelisin arttyrýǵa qyzyǵýshylyq bildirip otyr», - dep atap ótti kompanııadan.

«Qazaqstan ınjınırıng» Ulttyq kompanııasy» AQ-nyń quramyna enetin «KAE» JShS túnde kórýge arnalǵan quraldardy, teplovızııalyq dáldeýishterdi, elektrondy taqtalar men optıkalyq lınzalardy shyǵarýmen aınalysady.

Kásiporynnyń ónimderi búgingi kúni Qazaqstan áskerinde keńinen paıdalanylyp, shetelge eksporttalady.