Qazaqstan-Ózbekstan arasynda tótenshe jaǵdaı kezinde ózara kómek kórsetý týraly qujat maquldandy

ASTANA. QazAqparat – Májilistiń jalpy otyrysynda «Qazaqstan men Ózbekstan úkimetteri arasyndaǵy tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Atalǵan kelisimge 2021 jyly 6 jeltoqsanda elordada qol qoıyldy. Kelisim tótenshe jaǵdaıdyń aldyn alý salasynda Qazaqstan men Ózbekstan úkimetteriniń quzyretti organdary yntymaqtastyǵynyń quqyqtyq negizderin belgileýge baǵyttalǵan.

QR Tótenshe jaǵdaılar vıtse-mınıstri Marat Kúldikovtiń aıtýynsha, taraptardyń bireýiniń aýmaǵynda tótenshe jaǵdaı bolǵan kezde, birlesken is-qımyldardyń arqasynda osy kelisim erejesi iske asyrylmaq.

«Atalǵan kelisim tájirıbe almasýǵa, qaýip bolǵan jaǵdaıda turǵyndardy daıyndaýǵa, eki memlekettiń oqý oryndarynda azamattyq qorǵaý salasynda mamandardy oqytýǵa, bir eldiń aýmaǵynda bolǵan tótenshe jaǵdaıdy joıý kezinde kómek kórsetýge múmkindik beredi», - dedi vıtse-mınıstr.

Onyń sózine qaraǵanda, zań jobasynyń keri áseri joq jáne qarjylaı shyǵyndy talap etpeıdi. Zań jobasyn qabyldaý apattardyń qaýip-qaterin tómendetýge jáne taraptardyń aýmaǵynda tabıǵı, tehnogendi sıpattaǵy tótenshe jaǵdaıdyń saldaryn azaıtýǵa múmkindik beredi.