Qazaqstan óz tarıhynda jańa kezeńge qadam basty - Darhan Qydyráli

ALMATY. QazAqparat - Búgin Almatyda halyqaralyq Túrki akademııasy (TWESCO) uıymdastyrǵan «Rýhanı jańǵyrý: tulǵalar taǵlymy» dóńgelek ústeli barysynda qazaq tilin latyn álipbıine kóshirý máselesi talqylandy, dep habarlaıdy QazAqparat tilshisi.

Ǵalymdar, akademıkter el damýynyń mańyzdy tarıhı kezeńi týraly pikirlerin bildirdi.

«Búgingi bas qosýda Rýhanı jańǵyrý aıasynda  Elbasynyń latyn álipbıine kóshý týraly jarlyqqa qol qoıýynan soń birden ótýiniń úlken máni bar. Bul jarlyqty lıngvıst ǵalymdar, túrkologtar, zııaly qaýym ókilderi taldaýy zańdylyq. Aramyzda latyn álipbıine kóshýdi  90-jyldary kótergen aǵa-apalarymyz otyr. 1992 jyldary da Murat Jurynov aǵamyz, basqa da belgili ǵalymdar osy jóninde gazet betterinde maqalalar jarııalaǵan bolatyn. Olardyń bári shyndyqqa aınalyp, Qazaqstan óz tarıhynda jańa kezeńge qadam basyp otyr», - dedi Túrki akademııasy halyqaralyq uıymynyń basshysy Darhan Qydyráli.

Al QR UA prezıdenti Murat Jurynov endi iske kóshetin ýaqyt kelgenin aıtty.

«Búgingi óte mańyzdy másele - sııasy keppegen Elbasy jarlyǵy. Latyn álipbıine kóshýdi 94 jyldan beri ábden pisirdik. Prezıdent jarlyǵynan keıin pikir aıtýdy toqtatyp, oryndaý kerek. Endi iske kósheıik. Osy álipbı kompıýterge  syıady, barlyq prıntsıpter engizilgen, ońaı, qolaıly. Qazaq jeri túrki dúnıesiniń qara shańyraǵy, barlyq túrki urpaǵy osy uly daladan shyqqan», - dedi Murat Jurynov.

Esterińizge sala keteıik, Qazaqstan Respýblıkasynyń Prezıdenti Nursultan Nazarbaev qazaq tili álipbıin kırıllıtsadan latyn grafıkasyna kóshirý týraly Jarlyqqa qol qoıdy.